މި ވާހަކަ އޭނާ ދެއްކެވީ އުތުރުގެ ތިން އަތޮޅުގެ އެމްޑީޕީ ކައުންސިލަރުންނާއި ޑަބްލިޔުޑީސީ މެންބަރުން ބައިވެރިވެ ކުޅުދުއްފުށީގައި ބޭއްވުނު ކޮންފަރެންސެއްގައެވެ.
ފައްޔާޒު ވިދާޅުވީ ޕީޕީއެމް އަދި ޕީއެންސީގެ ފިކުރަކީ ލާމަރުކަޒުކުރުން ނޫން ކަމަށާއި، މިހާރުގެ ސަރުކާރުގެ އަމަލުތަކުން އެކަން ސާބިތުވާ ކަމަށެވެ. އޭނާ ފާހަގަކުރެއްވި ގޮތުގައި ކައުންސިލްތައް ބެލެހެއްޓުމަށް ވަކި މިނިސްޓްރީއެއް އުފެއްދުމާއި، ގާނޫނުތަކަށް ގެންނަ ބަދަލުތަކަކީ ލާމަރުކަޒީ ވިސްނުމާ ފުށުއަރާ ކަންކަމެވެ.
މި ކޮންފަރެންސްގައި ކުރީގެ ރައީސް އިބްރާހިމް މުހައްމަދު ސޯލިހާއި އެމްޑީޕީގެ ލީޑަޝިޕްގެ ބޭފުޅުންނާއި މާލެ، އައްޑޫ، ފުވައްމުލައް، ތިނަދޫ އަދި ކުޅުދުއްފުށީ މޭޔަރުން ބައިވެރިވެވަޑައިގެންނެވިއެވެ. ފައްޔާޒު ވިދާޅުވީ މި ކޮންފަރެންސްގައި ކައުންސިލްތަކަށް ދިމާވާ ގޮންޖެހުންތަކާއި ސަރުކާރުގެ އަމަލުތަކާ ބެހޭގޮތުން މަޝްވަރާކުރެވޭނެ ކަމަށެވެ.
އެމްޑީޕީން މިފަދަ ކޮންފަރެންސްތައް ރާއްޖޭގެ އެހެން ސަރަހައްދުތަކުގައި ވެސް ބާއްވާނެ ކަމަށް ފައްޔާޒު ވިދާޅުވިއެވެ. އަދި މި ކޮންފަރެންސްގައި އިގުރާރުވާ ކަންކަން ހާމަކޮށް، ރަނގަޅުކުރަންޖެހޭ ކަންކަން ސަރުކާރަށް ގޮވާލާނެ ކަމަށްވެސް އޭނާ ވިދާޅުވިއެވެ.
