މީގެ ތެރޭގައި ހިމެނެނީ ސަރުކާރުން ވިއްކާ ޓީބިލްތަކާއި ބޭންކުތަކުން ނަގާފައިވާ އެހެނިހެން ލޯނުތަކެވެ.
ވޯލްޑް ބޭންކުން އާންމުކޮށްފައިވާ އެންމެ ފަހުގެ ރިޕޯޓުގައި ބުނެފައިވާ ގޮތުގައި، ރާއްޖޭގެ ފައިނޭންޝަލް ސެކްޓަރު މެދުވެރިކޮށް ސަރުކާރުން މިހާތަނަށް 64 ބިލިއަން ރުފިޔާގެ ޓީބިލް ވިއްކާފައިވެއެވެ. މީގެ އިތުރުން، ސަރުކާރު ހިއްސާވާ ކުންފުނިތަކަށް ދޫކޮށްފައިވާ ލޯނުގެ އަދަދު 5.9 ބިލިއަން ރުފިޔާއަށް އަރާކަމަށްވެސް އެ ރިޕޯޓުގައި ފާހަގަކޮށްފައިވެއެވެ.
ރާއްޖޭގެ އެތެރޭގެ ދަރަނި އަހަރުން އަހަރަށް 9 އިންސައްތައިގެ މިންވަރަކަށް އިތުރުވަމުން އަންނަކަމަށް ވޯލްޑް ބޭންކުން ބުނެފައިވެއެވެ. މިގޮތުން، ބޭންކުތަކުގެ ޖުމުލަ އެސެޓުގެ 36 އިންސައްތަ އަކީ ސަރުކާރުން ނަގާފައިވާ ދަރަންޏެވެ. އަދި ޕެންޝަން އޮފީސް ފަދަ އެހެނިހެން މާލީ އިދާރާތަކުގެ ޖުމުލަ އެސެޓުގެ 68 އިންސައްތަ އަކީވެސް ސަރުކާރަށް ނިސްބަތްވާ ދަރަނިކަމަށް ވޯލްޑް ބޭންކުން ފާހަގަކޮށްފައިވެއެވެ.
ރާއްޖޭގެ ކްރެޑިޓް ރޭޓިން ދަށަށް ގޮސް، ބޭރުން ފައިނޭންސް ހޯދުމަށް ދަތިތަކާ ކުރިމަތިވެފައިވާތީ، ސަރުކާރުން މިހާ ބޮޑަށް އެތެރޭގެ ދަރަންޏަށް ބަރޯސާވާން ޖެހިފައިވާކަމަށް ވޯލްޑް ބޭންކުން ބުނެފައިވެއެވެ. މިކަމުގެ ސަބަބުން ރާއްޖޭގެ މާލީ ހާލަތަށް ކުރިމަގުގައި ނޭދެވޭ އަސަރުތަކެއް ކުރުމަކީ އެކަށީގެންވާ ކަމެއްކަމަށް އިގްތިސާދީ މާހިރުން ވަނީ ފާހަގަކޮށްފައެވެ.
