މި ރިޕޯޓަކީ މޯލްޑިވްސް ޑިވެލޮޕްމެންޓް ރިޕޯޓުގެ ނަމުގައި އޮކްޓޯބަރު 10 ވަނަ ދުވަހު އާންމުކުރި ރިޕޯޓެކެވެ.
ރިޕޯޓުގައި ފާހަގަކޮށްފައިވާ ގޮތުގައި، ފާއިތުވި ހަތަރު މަސް ދުވަހުގެ ތެރޭގައި ބޭންކުތަކަށް ބޭރު ފައިސާ ޖަމާކުރާ މިންވަރު ދަށްވެފައިވެއެވެ. މިގޮތުން ޖުލައި މަހު ނިމުނުއިރު ބޭރު ފައިސާ ޖަމާކުރި މިންވަރު 1.4 އިންސައްތައިން ދަށްވެފައިވާކަމަށް ވޯލްޑް ބޭންކުން ބުނެފައިވެއެވެ. މީގެ ސަބަބުން ބޭންކުތަކުގައި ބޭނުންކުރެވޭ ގޮތަށް ހުރި ބޭރު ފައިސާގެ އަދަދު ނުވަތަ ލިކުއިޑިޓީ ދަށްވެފައިވާކަން ރިޕޯޓުގައި ފާހަގަކޮށްފައިވެއެވެ.
އެހެންނަމަވެސް، ބޭންކުތަކުން ލޯނު ދޫކުރާ މިންވަރު އިތުރުވަމުންދާކަން ވޯލްޑް ބޭންކުން ފާހަގަކޮށްފައިވެއެވެ. މި އަހަރުގެ ޖުލައި މަހު ނިމުނުއިރު، ފާއިތުވި އަހަރާ އަޅާބަލާއިރު ލޯނު ދޫކުރި މިންވަރު 12 އިންސައްތަ އިތުރުވެފައިވެއެވެ. ޚާއްސަކޮށް ފަރުދުންގެ އަމިއްލަ ބޭނުންތަކަށް ދޫކުރާ ލޯނުތަކާއި ކޮންސްޓްރަކްޝަން ދާއިރާއަށް ދޫކުރާ ލޯނުތައް އިތުރުވެފައިވާކަން ފާހަގަކޮށްފައިވެއެވެ.
ބޭންކުތަކަށް ބޭރު ފައިސާ ލިބުމުގައި ހުރި ދަތިތައް ހައްލުކުރުމަށްޓަކައި، މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން އައު ގަވާއިދެއް ތައާރަފުކޮށްފައިވެއެވެ. މި ގަވާއިދުގެ ދަށުން، ޓޫރިޒަމް ދާއިރާއިން ލިބޭ ބޭރު ފައިސާގެ އާމްދަނީގެ ވަކި މިންވަރެއް ރާއްޖޭގެ ބޭންކުތަކަށް މާރުކުރުން ލާޒިމުކޮށްފައިވެއެވެ. މިކަމުގެ ސަބަބުން ބޭންކުތަކަށް ލިބޭ ބޭރު ފައިސާގެ އަދަދު އިތުރުވެ، ބޭރު ފައިސާއިން ދެވޭ ހިދުމަތްތައް ފުޅާކުރެވޭނެކަމަށް އުންމީދުކުރެވެއެވެ.
