ރާއްޖޭގެ އެންމެ ކާމިޔާބު ފުޓުބޯޅަ ކްލަބް ނިއު މި ވަގުތު އޮތީ ދެ ވަނަ ޑިވިޝަނުގަ އެވެ. އެ ކްލަބުން މި މަހުގެ 20 ވަނަ ދުވަހު ކޮންގްރެސް ބާއްވަން ތައްޔާރުވަމުން އަންނައިރު، އެ ކްލަބްގެ ޗެއާމަންކަމުގެ މަގާމު މި ވަގުތު އޮތީ ހުސްވެފައެވެ. އެއީ ކުރިން އެ މަގާމުގައި ހުންނެވި އަހުމަދު ވާސިފް އިސްތިއުފާ ދެއްވުމުންނެވެ.
ރިޕޯޓްތައް ބުނާ ގޮތުން ކުރިން ރައްޔިތުންގެ މަޖިލީހުގެ މެންބަރުކަންވެސް ކުރައްވާފައިވާ މުބީން، ނިއުގެ ޗެއާމަންކަން ގެންނަން ކްލަބުގެ އިސް ސަޕޯޓަރުން އަންނަނީ ލޮބީ ކުރަމުންނެވެ. ބައެއް މީޑިއާތަކަށް މުބީން ވިދާޅުވެފައިވާ ގޮތުގައި މުބީން ހުންނެވީވެސް އެކަމަށް ތައްޔާރުވެވަޑައިގެންނެވެ. މުބީންއަކީ އަބަދުވެސް ނިއުގެ ވަރުގަދަ ސަޕޯޓަރެކެވެ.
"ކްލަބްގެ ކޮންމެ މަގާމެއް އަޅުގަނޑާ ހަވާލުކުރިޔަސް އެ މަގާމެއް ފުރަން މިހުރީ ތައްޔާރަށް. ރާއްޖޭގެ ފުޓުބޯޅައިގެ ހާލަތު ވެއްޓިފައިވާ ވަޅުގަނޑުން އަރައިގަތުމަށް ނިއު ރޭޑިއަންޓަކީ މުހިންމު ބައިވެރިއެއް،" މުބީންއާ ހަވާލާދީ ރިޕޯޓްތައް ބުނެއެވެ.
ރާއްޖޭގެ އެންމެ ކާމިޔާބު ކްލަބު އަޑި އަޅާލީ، އެފްއޭއެމުން އެ ކްލަބު ސަސްޕެންޑް ކުރުމުންނެވެ. ނިއު އިން އެފްއޭއެމްގެ ރައީސް ބައްސާމް އަދީލް ޖަލީލްގެ ލީޑަޝިޕް ބަދަލުކުރަން ކުރި މަސައްކަތުގައި، ބައިވެރިވުމުން، 2019 ވަނަ އަހަރު އެފްއޭއެމް އިން ނިއު ސަސްޕެންޑްކުރި އެވެ. އެ އަޑިގަނޑުން ނިއު އަރައިގަނެ، 2022 ވަނަ އަހަރު ކުޅުނު ދެ ވަނަ ޑިވިޝަން މުބާރާތަށް ނިއު އިން ނުކުމެވޭވަރު ކުރީ ވާސިފް ހިމެނޭހެން ނިއުގެ އެކި ސަޕޯޓަރުންގެ ގްރޫޕެއް އިސްނަގައިގެން ކުރި މަސައްކަތުންނެވެ.
