ކުރީ ސަރުކާރުން ހިންގި ގެދޮރުވެރިޔާ ސްކީމްގެ ދަށުން "ގެދޮރުވެރިޔާ ސްކީމް" ގެ ދަށުން ހުޅުމާލޭ ދެވަނަ ފިޔަވަހީގައި ތަރައްގީކުރާ 4،000 ހައުސިން ޔުނިޓް ލިބޭ ފަރާތްތަކުގެ ލިސްޓް މިމަހު އާއްމުކުރާނެކަމަށް 2023 ޖުލައި 29 ގައި ހައުސިން މިނިސްޓަރު ޑރ އަލީ ހައިދަރު ވަނީ ވިދާޅުވެފައެވެ.
ހައުސިން މިނިސްޓްރީން ބުނީ މިމަަސް ނިމުމުގެ ކުރިން ފްލެޓް ލިބޭ މީހުންގެ ލިސްޓު އިއުލާން ކުރުމަށް ކުރަންޖެހޭ މަސައްކަތްތައް ދަނީ ކުރަމުން ކަމަށެވެ.
ގެދޮރުވެރިޔާ ސްކީމްގެ ފުރަތަމަ ބުރުގައި ފްލެޓަށް 21،000 މީހުން ކުރިމަތިލިއިރު، އޭގެ ތެރެއިން 12،000 މީހުން ފްލެޓަށް ޝަރުތު ހަމަވާ ކަމަށް ވަނީ ކުރީ ސަރުކާރުން ކަނޑައަޅާފައެވެ. އަދި ޝަރުތު ހަމަވާ ފަރާތްތަކުގެ ތެރެއިން ފުރަތަމަ 4،000 ފްލެޓް ލިބޭނެ މީހުން ކަނޑައަޅައި، އެ މީހުންނަށް ވަނީ ފްލެޓް ލިބުނު ކަމުގެ ލިޔުން ވެސް ދީފަ އެވެ.
ނަމަވެސް އެ މައްސަލަ ތަހުގީގު ކުރުމަށް ފަހު، އޭސީސީން ބުނެފައި ވަނީ ކުރީ ސަރުކާރުން ދޫކުރި 4000 ފްލެޓް ދީފައިވާ މީހުންގެ ތެރެއިން 60 ޕަސެންޓް މީހުންނަކީ ޝަރުތު ހަމަނުވާ މީހުން ކަމަށެވެ.
މި ސަރުކާރުން ވަނީ އާ ފްލެޓް ކޮމިޓީއެއް ހަދައި، އެ ލިސްޓު މުރާޖައާ ކުރުމުގެ މަސައްކަތް ފަށައިފަ އެވެ.
މި ފްލެޓްތައް އިމާރާތް ކުރުމުން އަންނަނީ އިންޑިއާގެ އެގްޒިމް ބޭންކުގެ ސޮވެރިން ގެރެންޓީއެއް ދިވެހި ސަރުކާރަށް ދީގެންނެވެ. އެގްޒިމް ބޭންކުގެ 227 މިލިޔަން ޑޮލަރު ސޮވެރިން ގެރެންޓީގައި ހުޅުމާލޭގައި ޖުމްލަ 32 ޓަވަރު އަންނަނީ އިމާރާތްކުރަމުންނެވެ. މި ޓަވަރުތަކުގައި ހިމެނެނީ 2 ކޮޓަރީގެ 1200 ހައުސިން ޔުނިޓާއި، 3 ކޮޓަރީގެ 2800 ހައުސިން ޔުނިޓެވެ.
