ބީއެމްއެލްއިން މި ނީލަން ބާއްވަން ނިންމާފައިވަނީ ރީކޯ މޫސަގެ ކުންފުންޏެއް ކަމަށްވާ އީސްޓް މޯލްޑިވްސްއިން ނަގާފައިވާ ލޯނެއް ނުދެއްކުމުގެ ސަބަބުންނެވެ. މި ލޯނަކީ 2016 ވަނަ އަހަރު ނަގާފައިވާ 8.9 މިލިއަން ރުފިޔާގެ ލޯނެކެވެ. މިހާރު މި ލޯނަށް ނުދައްކާ އޮތް އަދަދު 7 މިލިއަން ރުފިޔާއަށްވުރެ ގިނަ އެވެ.
ނީލަމުގައި ވިއްކާލަން ހަމަޖެހިފައިވަނީ 265 ޓަނުގެ ކޮޅުވެއްޓިއެކެވެ. ނީލަން ނިމޭނީ މި މަހުގެ 21 ވަނަ ދުވަހު އެވެ. ނީލަމުގައި ބައިވެރިވާ ފަރާތްތަކުން ހުށަހަޅާ އަގުތައް ކޮންމެ ދުވަހަކު ބީއެމްއެލްގެ ވެބްސައިޓުން ފެންނަން ހުންނާނެ އެވެ. އަދި އެންމެ މަތީ އަގަށް ބަދަލެއް ނައިސް 5 ދުވަސް ވުމުން ނީލަން ނިންމާލެވޭނެ އެވެ.
މި ނީލަމަކީ ރީކޯ މޫސަގެ ވިޔަފާރިތަކަށް ދިމާވެފައިވާ މާލީ ދަތިތަކުގެ އިތުރު ހެއްކެކެވެ. މީގެ ކުރިން ވެސް ރީކޯ މޫސަގެ ކުންފުނިތަކުން އެކި ފަރާތްތަކަށް ދައްކަންޖެހޭ ފައިސާ ނުދެއްކުމުގެ ސަބަބުން ކޯޓުތަކުން ވަނީ އެތައް ހުކުމެއް ކޮށްފަ އެވެ. އަދި ފަހުން ރީކޯ މޫސަގެ ރިސޯޓެއްގެ މުވައްޒަފުންނަށް މުސާރަ ނުދޭތާ ތިން މަސް ވެގެން މުވައްޒަފުން ޝަކުވާ ވެސް ކޮށްފައިވެ އެވެ.
