ޓެކްސް ނުދައްކާ ފަރާތްތަކުގެ ނަން އާންމުކޮށްފައިވަނީ އެ ފަރާތްތަކުގެ ނަން ހާމަކުރުމުގެ ކުރިން ފައިސާ ދެއްކުމަށް ތަކުރާރުކޮށް ހަނދާންކޮށްދީ ތަފާތު ނޯޓިސްތައް ފޮނުވައި އިތުރު މުއްދަތުތަކާއި ފުރުސަތުތައް ވެސް ދިނުމަށް ފަހު ކަމަށް މީރާ އިން ބުންޏެވެ.
އަދި އެ ފަރާތްތަކަށް އެއްފަހަރާ ފައިސާ ދެއްކެން ނެތްނަމަ އިންސްޓޯލްމަންޓު އުސޫލުން ބަހާލައިގެން ފައިސާ ދެއްކުމުގެ އެއްބަސްވުމަކަށް އައުމުގެ ފުރުސަތު ވެސް ދިންކަމަށާއި އެފަދަ އެއްބަސްވުމެއް ހަދައި، ފައިސާ ދައްކާނަމަ އެންފޯސްމަންޓުގެ އިތުރު ފިޔަވަޅުތައް ނާޅާނެ ކަމުގެ ޔަގީންކަން ވެސް މީރާއިން ވަނީ ދީފަ އެވެ.
މީރާ އިން ބުނީ ފާއިތުވި ތިން މަސް ތެރޭގައި ޖުމްލަ 44،390 އެސްއެމްއެސް، 22,761 ފޯނުކޯލް އަދި 30,550 ނޯޓިސް ޓެކްސް ދައްކާ ފަރާތްތަކަށް ފޮނުވާފައިވާ ކަމަށެވެ. އޭގެ އިތުރުން 397 ފަރާތަކަށް އިންސްޓޯލްމަންޓް ޕްލޭންތަކުގެ ދަށުން ބަހާލައިގެން ފައިސާ ދެއްކޭނެ ލުއިގޮތްތަށް ހަމަޖައްސައިދީފައި ވާނެ ކަމަށް ވެސް މީރާއިން ބުންޏެވެ.
މީރާއިން ބުނީ ޓޫރިޒަމް ޓެކްސްއާއި ގްރީން ޓެކްސްގެ ގޮތުގައި އެ ފަރާތްތަކުން ދައްކަންޖެހޭ ފައިސާގެ އަދަދު 100،000،000 ރުފިޔާއަށް އަރާ ކަމަށެވެ.
ޓެކްސް ނުދައްކާ ފަރާތްތަކުގެ ތެރޭގައި ރިސޯޓު ވިޔަފާރީގައި ނަން މަޝްހޫރު ގިނަ ކުންފުނިތަކެއް ހިމެނެ އެވެ. އޭގެ ތެރެއިން ފިލިތެޔޮ އާއި ހޮނޑާފުއްޓާއި މެދުފުއްޓަކީ ތްރީއޭ ކުންފުނީގެ ތިން ރިސޯޓެވެ. އެއީ، ކުރީގެ ރައީސް ސޯލިހުގެ ސަރުކާރުގެ ރައީސް އޮފީހުގެ މިނިސްޓަރު އަލި ޝިޔާމްގެ އާއިލާ އިން ހިންގާ ކުންފުންޏެކެވެ. ރަހާ ރިސޯޓަކީ ރައްޔިތުންގެ މަޖިލީހުގެ ނައިބު ރައީސް ރީކޯ މޫސާ މަނިކުގެ ރިސޯޓެކެވެ.
މީރާއިން ވަނީ ޓެކްސް ދައްކާ ފަރާތްތަކުން ޓެކްސް ފައިސާ، ސުންގަޑިއަށް އަދާކުރަމުންގެންދިއުމަށް އެދިފަ އެވެ.
