ދިވެހި ފުލުހުނގެ ހިދުމަތުން ބުނީ ގަނޑުކުރި ކުކުޅުތަކަކާއި، ޗިކަން ނަގެޓްސް އަދި ފިޔާ ތަކެއްގެ ވެރި ފަރާތް ހޯދަމުން އަންނަކަމަށެވެ. މި ތަކެއްޗަކީ މިއަދު މެންދުރުފަހުގެ ވަގުތެއްގައި މާލޭން ހުޅުމާލެ ލަކުޑި ޖެޓީއަށް ދަތުރުކުރި ޓެކްސީއެއްގެ ޑިކީ ތެރެއިން ފެނިފައިވާތަކެތި ކަމަށް ފުލުހުން ބުނެއެވެ.
މި ތަކެތީގެ ވެރިފަރާތުން، ހުޅުމާލެ ފޭސް 1 ޕޮލިސް ސްޓޭޝަނަށް ހާޒިރުވެ ތަކެއްޗާ ހަވާލުވުމަށް ފުލުހުން އެދެއެވެ. އަދި އިތުރު މައުލޫމާތު ސާފުކުރަން ބޭނުންނަމަ ހުޅުމާލެ ފޭސް 1 ޕޮލިސް ސްޓޭޝަނުގެ ނަންބަރު 9980062 ގުޅުމަށްވެސް ފުލުހުން އިލްތިމާސްކުރެއެވެ.
މަގުމަތިން ހޯވާ ތަކެއްޗާއި މީސް މީހުންނަށް ތަންތަނަށް ހަނދާނެތި ދޫކޮށްލެވޭ ތަކަތި ވެރި ފަރާތްތަކާއި ހަވާލުކުރުމުގެ މަސައްކަތް ފުލުހުން އަންނަނީ ކުރަމުންނެވެ. އެގޮތުން މިދިޔަ މަހުގެ 25 ވަނަ ދުވަހުވެސް ހުޅުމާލޭ މަގެއްގެ މަތިން ފެނުނު ކުކުޅު ކޭސްތަކެއްގެ ވެރިން ހޯދަން ފުލުހުން އިއުލާންކުރިއެވެ.
