އަމީރު މިހެން ވިދާޅުވެފައިވަނީ ދައުލަތުގެ އާމްދަނީ އިތުރުކުރުމަށް ޓޫރިޒަމް ދާއިރާގެ ޓެކްސްތައް އިތުރުކުރަން ސަރުކާރުން ނިންމުމާ ގުޅިގެންނެވެ.
އަމީރު ވިދާޅުވީ ޓެކްސް ބޮޑުކުރަން ވާނީ ހަރަދު ކުޑަކުރަން އަޅަން ޖެހޭ ފިޔަވަޅުތައް އެޅުމަށް ފަހުގައި ކަމަށެވެ. އޭނާ ފާހަގަކުރެއްވި ގޮތުގައި ސަރުކާރުން ސިޔާސީ މުވައްޒަފުންގެ އަދަދު ކުޑަކުރުމާއި، ޓެކްސް ފައިސާ ހަރަދުކުރާ ގޮތް ހާމަކުރުމާއި، ސަރުކާރު ކުންފުނިތަކުގެ ހިންގުން ހަރުދަނާކުރުމާއި، ސިޔާސީ ބޭނުންތަކަށް ކުރާ ދަތުރުތައް މަދުކުރުމާއި، ބޭނުމެއް ނެތް ޕްރޮޖެކްޓުތައް ހުއްޓާލުން ހިމެނެ އެވެ.
އަމީރު އިތުރަށް ފާހަގަކުރެއްވި ގޮތުގައި މެދު ރާސްތާގެ އާމްދަނީގެ އިސްތިރާޖުގައި ނުހިމެނޭ ކަންތައްތަކެއް ކުރަން ހުށަހަޅާފައިވާތީ އެކަމާމެދު ކަންބޮޑުވެ އެވެ. އޭނާ ވިދާޅުވީ މިއީ ގާނޫނެއްގެ ދަށުން ގާނޫނީ ބާރުވެރިކަން ލިބިފައިވާ ލިޔުމަކަށްވީއިރު، އެއާ ހިލާފަށް ކަންކަން ނުކުރެވޭނެ ކަމަށެވެ.
ޓޫރިޒަމް ސިނާއަތަށް އަސަރުކުރާ ގޮތަށް އަނެއްކާ ވެސް ޓެކްސްތައް ބޮޑުކުރުމަކީ ރަނގަޅު ގޮތެއް ނޫން ކަމަށް އަމީރު ފާހަގަކުރެއްވި އެވެ. އޭނާ ވިދާޅުވީ ފަހަރުގައި ޓެކްސް އިތުރުކުރުމުން އާމްދަނީ އިތުރުވުމުގެ ބަދަލުގައި ޓެކްސް އާމްދަނީ ދަށްވުމުގެ ފުރުސަތު އެބައޮތް ކަމަށެވެ. އޭނާ ވިދާޅުވީ ރިސޯޓުތަކަށް އަންނަ ޓޫރިސްޓުންގެ އަދަދު މަދުވުމާއެކީ، އެ ތަންތަނުގެ އާމްދަނީއަށް ނުރަނގަޅު އަސަރުކޮށްފާނެ ކަމަށެވެ.
