މިފްކޯއިން ބުނީ 28 ސެޕްޓެމްބަރުން ފެށިގެން މިފްކޯއަށް ކިރާފައިވާ މަހުގެ ފައިސާ "ވީއެންމެ އަވަހަަކަށް ދެއްކުމަށް މަސައްކަތް ކުރަމުން ދާ" ކަމަށެވެ.
މަސްވެރިކަން ދަށްވެ، ކުންފުނީގެ މާލީ ހާލަތު ހުރިގޮތުން ފައިސާ ދެއްކޭނެ ވަކި ތާރީހެއް ހާމަކުރަން އަދި ދަތިކަމަށް މިފްކޯއިން ބުނެއެވެ. އަދި އެ މުއްދަތުގެ ތެރޭގައި ކިރި މަހުގެ ފައިސާ ހޯދުމަށް ކުރިއެކޭވެސް އެއްގޮތަށް ސަރުކާރާއެކުގައި ދަނީ ގިނަ މަސައްކަތްތަކެއް ކުރެވެމުން ކަމަށްވެސް މިފްކޯއިން ބުނެއެވެ.
މިފްކޯއިން ބުނިގޮތުގައި އުންމީދަކީ ވީއެންމެ އަވަހަކަށް ފައިސާ ދައްކާ ހަލާސްކުރުން ކަަމަށާއި އެކަމުގައި އިތުރު މައުލޫމާތު ލިބޭ މިންވަރަކުން ހިއްސާކުރާމުން ގެންދާނެ ވާހަލަވެސް މިފްކޯއިން ބުނެއެވެ.
މި ސަރުކާރުގެ އަމާޒަކަށް ކުރިން ކަނޑައެޅީ މަސް ކިރާތާ އެންމެ ލަސްވެގެން 48 ގަޑިއިރުގެ ތެރޭގައި މަސްވެރިންނަށް ފައިސާ ދިނުމެވެ. ނަމަވެސް އެގޮތަށް އެކަން ކުރިއަށް ގެންދަން ދަތިވީ ދުނިޔޭގެ ބާޒާރުގައި މަހަށް ލިބޭ އަގު ވެސް ރަނގަޅުވެގެން ކަމަށް ސަރުކާރުން ބުނެފައިވެއެވެ.
މާލީ ހާލަތު ވަރަށް ދަށްކޮށް އޮތް މިފްކޯއަށް ޕްރައިވެޓައިޒޭޝަން އެންޑް ކޯޕަރަޓައިޒޭޝަން ބޯޑް އިން އެ ކުންފުންޏަށް ސީއީއޯއަކު ހޯދަން މިހާރު ވަނީ ރާއްޖެއިން ބޭރަށް ހުޅުވާލާފައެވެ.
