މި ފުރުސަތުގެ ދަށުން، ބޭންކިން އަދި ފައިނޭންސްއާ ގުޅުންހުރި ދާއިރާތަކުން ކިޔެވުމަށް 3 ދަރިވަރުންނަށް ފުރިހަމަ ސްކޮލަރޝިޕް ދިނުމަށް ވަނީ ހަމަޖެހިފައެވެ.
ބީއެމްއެލް ސްކޮލަރޝިޕް ފަންޑުގެ ނަމުގައި ތައާރަފުކޮށްފައިވާ މި ޕްރޮގްރާމަކީ އަހަރަކު އެއްފަހަރު ދެވޭ މެރިޓް އަސާސްގެ މައްޗަށް ބިނާކޮށް ދެވޭ ސްކީމެކެވެ. މި ސްކޮލަރޝިޕްގެ ދަށުން ޓިއުޝަން ފީ، މަހު އެލަވަންސް، ވިސާ ފީ، އަހަރީ ފޮތުގެ އެލަވަންސް، އެސްޓަބްލިޝްމަންޓް އެލަވަންސް އަދި ވައިގެ ދަތުރުފަތުރުގެ ޓިކެޓް ހިމެނޭ ގޮތަށް ހުރިހާ ހަރަދެއް ކަވަރުކޮށްދެއެވެ.
މި ސްކޮލަރޝިޕަށް ކުރިމަތިލެވޭނީ 18 އަހަރާއި 25 އަހަރާ ދެމެދުގެ ދިވެހި ރައްޔިތުންނަށެވެ. އަދި ހައި ސެކަންޑަރީ އެޑިއުކޭޝަން (އޭ ލެވެލް) ފުރިހަމަކޮށް ހުރިހާ މާއްދާއަކުން ފާސްވެފައިވާ ދަރިވަރުންނަށެވެ. ކިޔެވުމަށް ހޮވޭ ދަރިވަރުންނަށް ޓައިމްސް ހަޔާ އެޑިއުކޭޝަން ޔުނިވަރސިޓީ ރޭންކިން ގައިޑްގައި ލިސްޓްކޮށްފައިވާ މަތީ 200 ޔުނިވަރސިޓީގެ ތެރެއިން ކޮންމެ ޔުނިވަރސިޓީއެއްގައި ވެސް ކިޔެވޭނެއެވެ.
ބީއެމްއެލްއިން މި ފުރުސަތު ހުޅުވާލުމުގެ މައިގަނޑު މަގުސަދަކީ ބޭންކިން އަދި ފައިނޭންސް ދާއިރާއަށް ހުނަރުވެރި ދިވެހި ޒުވާނުން އުފެއްދުމެވެ. މި ސްކޮލަރޝިޕަށް އެދޭ ފަރާތްތަކުން 10 ނޮވެމްބަރު 2024 ގެ ނިޔަލަށް އެޕްލިކޭޝަން ހުށަހަޅަންޖެހޭނެއެވެ. މި ފުރުސަތަކީ ދިވެހި ދަރިވަރުންނަށް ދުނިޔޭގެ ފެންވަރުގައި ތައުލީމު ހާސިލުކުރުމަށް ލިބޭ އަގުހުރި ފުރުސަތެއް ކަމަށް ބީއެމްއެލްއިން ބުނެއެވެ.
