ޝުޖާއު މިހެން ވިދާޅުވީ ޓީޖީއެސްޓީ ހިމެނޭ ގޮތަށް ތިން ގާނޫނަކަށް އިސްލާހު ގެނައުމަށް ސަރުކާރުން ހުށަހަޅާފައިވާ ބިލަށް ވާހަކަދައްކަވަމުންނެވެ.
ޝުޖާއު ވިދާޅުވީ ސަރުކާރުން މި އިސްލާހުތައް ހުށަހަޅާފައިވަނީ ރައްޔިތުންނަށް ބުރަ ނުޖައްސައި ދައުލަތުގެ އާމްދަނީ އިތުރުކުރެވޭނެ ނިޒާމެއްގެ ގޮތުގައި ކަމަށެވެ. އަދި މިއީ ރާއްޖޭގެ އިގްތިސާދު އޮތް ހާލަތަށް ބަލާއިރު މިވަގުތަށް ކޮންމެހެން މުހިންމު އިސްލާހުތަކެއް ކަމަށްވެސް އޭނާ ފާހަގަކުރެއްވިއެވެ.
"ރައީސުލްޖުމްހޫރިއްޔާގެ ވިސްނުންފުޅަކީ ރައްޔިތުންގެ ޖީބަށް ބާރު ބޮޑު ނުކޮށް ދައުލަތުގެ އާމްދަނީ އިތުރުކުރުން. ޖީއެސްޓީ އިތުރު ނުކޮށް، ޓީޖީއެސްޓީއަށް އެންމެ ޕަސަންޓެއް އިތުރުކުރަނީ،" ޝުޖާއު ވިދާޅުވިއެވެ.
ނަމަވެސް އިދިކޮޅު ފަރާތްތަކުން ވަނީ މި ބިލާ ދެކޮޅު ހަދާފަ. ހަނިމާދޫ ދާއިރާގެ މެންބަރު އަބްދުލްގަފޫރު މޫސާ ވިދާޅުވީ ދުނިޔެ އޮތް ނާޒުކު ދަނޑިވަޅަށް ބަލާއިރު ޓެކްސް ބޮޑުކުރުމުގެ ސަބަބުން ރާއްޖެއަށް ކުރާނެ އަސަރަށް ވިސްނަންޖެހޭ ކަމަށެވެ. އަދި ރާއްޖޭގެ ދިރިއުޅުމުގެ ހާލަތު މިހާރު އޮތް ގޮތުން މިއީ ހިތާމަކުރަންޖެހޭ ކަމެއް ކަމަށްވެސް އޭނާ ވިދާޅުވިއެވެ.
ސަރުކާރުން ވަނީ މިހާރު 16 ޕަސަންޓުގައި ހުރި ޓީޖީއެސްޓީ 17 ޕަސަންޓަށް ބަދަލުކުރުމަށް ހުށަހަޅާފައެވެ. މިއާއެކު ދައުލަތުގެ އާމްދަނީއަށް 201.9 މިލިއަން ރުފިޔާގެ އިތުރުވުމެއް އަންނާނެކަމަށް ސަރުކާރުން ބުނެއެވެ.
