ނަޒީރުގެ މަގާމު ގެއްލުނު އިރު ހިދުމަތުގެ މުއްދަތު ގުނާފައިވަނީ އެހެންޏާ އަމަލު ކުރާ ގޮތާ ތަފާތުކޮށް ކަމަށާއި އެ ގޮތަށް ނުކުރެވޭނެ ކަމަށް ނިންނީ ވަޒީފާއާބެހޭ ޓްރައިބިއުނަލުންނެވެ. އެ ނިންމުމަށް ހައިކޯޓުންވެސްވަނީ ތާއީދުކޮށްފަ އެވެ. އެ މައްސަލަ ހައިކޯޓަށް ހުށަހެޅީވެސް ޖޭއެސްސީންނެވެ. ޖޭއެސްސީއަށް ހައިކޯޓުން އެ މައްސަލަ ކާމިޔާބު ނުވުމުން މިހާރު އެ މައްސަލަވަނީ ސުޕްރީމް ކޯޓުގައި އިސްތިއުނާފުކޮށްފަ އެވެ.
މި މައްސަލައަކީ، ޖޭއެސްސީ ގާނޫނަށް ރައްޔިތުންގެ މަޖިލީހުން ގެނައި އިސްލާހުތަކާއި އެކު ޗީފް ޖުޑީޝަލް އެޑްމިނިސްޓްރޭޓަރުގެ މަގާމު ޑރ. ނަޒީރަށް ގެއްލުމުން، އޭނާއަށް ރިޑަންޑަންސީގެ އިނާޔަތްތައް ކަނޑައެޅުމުގައި އަމަލު ކުރި ގޮތާމެދު ހިތްހަމަ ނުޖެހިގެން ޑރ. ނަޒީރު ވަޒީފާއާބެހޭ ޓްރައިބިއުނަލަށް ހުށަހެޅި މައްސަލަ އެވެ.
މި މައްސަލައިގައި ވަޒީފާއާބެހޭ ޓްރައިބިއުނަލުން ޖޭއެސްސީއާ ދެކޮޅަށް ކޮށްފައިވާ ހުކުމުގައި ބުނެފައިވަނީ ޑރ. ނަޒީރުގެ މަގާމު ގެއްލުމުން އޭނާއަށް ރިޑަންޑެންސީ އިނާޔަތްތައް ދިނުމުގައި ޖޭއެސްސީގެ ސިޓީއަކާ ހަވާލާދީ އަމަލުކޮށްފައިވަނީ އެހެންޏާ އަމަލު ކުރަމުން އައިސްފައިވާ ގޮތަށް ނޫން ކަމަށެވެ. އަދި އެ ގޮތަށް އަމަލު ކުރުމަކީ މުވައްޒަފުންގެ މެދުގައި ތަފާތު ކުރުމެއް ކަމަށްވެސް ވަޒީފާއާބެހޭ ޓްރައިބިއުނަލުގެ ތިން މެންބަރުންގެ އިއްތިފާގުން ނިންމި ނިންމުމުގައި ބުނެފައިވެ އެވެ.
ޖުޑީޝަލް އެޑްމިނިސްޓްރޭޓަރުގެ މަގާމަށް ޑރ. ނަޒީރު އައްޔަންކޮށްފައިވަނީ ދެހާސް އަށާރަވަނަ އަހަރުގެ ފަހުކޮޅު އެވެ. ޑރ. ނަޒީރުގެ މަގާމު ގެއްލުނީ ޖޭއެސްސީ ގާނޫނަށް އެމްޑީޕީން ގެނައި އިސްލާހަކާއެކު އެވެ. އޭގެ ފަހުން އެ މަގާމު އަދާކުރައްވަމުން ގެންދެވީ އާއިޝަތު ރިޒްނާ އެވެ. އަދި ރިޒްނާ އިސްތިއުފާ ދެއްވުމުން އެ މަގާމު މިވަގުތު އޮތީ ހުސްކޮށެވެ.
