ސައީދު ވިދާޅުވީ، ރާއްޖެއަށް ރުޕޭ ކާޑުގެ ހިދުމަތް ތައާރަފުކުރުމަކީ ރާއްޖޭގެ މާލީ ދާއިރާ މިހާރަށްވުރެ ކުރިއަރުވާ ޒަމާނީ އީވޮލެޓްތަކުގެ ހިދުމަތްތައް ރާއްޖެއަށް ތައާރަފުކުރުމަށް ކުރާ މަސައްކަތްތަކުގައި ކުރިއަށް އެޅުނު މުހިންމު ފިޔަވަޅެއްކަމަށެވެ.
ރާއްޖޭގައި މި ހިދުމަތް ތައާރަފުވެގެން ދިއުމުން އިންޑިއާއިން ރާއްޖެ އަންނަ ފަރާތްތަކަށް ރާއްޖޭގައި މުދަލާއި ހިދުމަތުގެ އަގަށް މި ކާޑުން ފައިސާ ދެއްކޭނެކަމަށް މިނިސްޓަރު ވިދާޅުވި އެވެ. އަދި މީގެ ސަބަބުން އިންޑިއާގެ ފަތުރުވެރިންގެ މާކެޓް އިތުރުކުރުމަށް މަގުފަހިވެގެންދާނެކަމަށްވެސް މިނިސްޓަރު ވިދާޅުވެ އެވެ.
ސައީދު މިއަދު ސޯޝަލްމީޑިއާގައި ކުރެއްވި ޕޯސްޓެއްގައި ވިދާޅުވީ ޑިވެލޮޕްމަންޓް ބޭންކުން އިގްތިސާދީ ތަރައްގީގެ ޕްލޭންގައި ހިމެނޭ އެކި ސިނާއަތްތަކަށް ބޭނުންވާ ފައިނޭންސް ހޯދުމުގައި މުހިއްމު ދައުރެއް އަދާކުރާނެ ކަމަށެވެ.
މީގެ އިތުރުން ޑިވެލޮޕްމެންޓު ބޭންކު ރާއްޖެއަށް މުހިންމުވާ ސަބަބުތައް ވެސް މިނިސްޓަރު ވަނީ ކިޔައިދެއްވަފަ އެވެ. އެގޮތުން، މަންފާއެއް ނުލިބި ގިނަދުވަސް ވެފައިވާ ރަށްތަކާއި ފަޅުތައް ތަރައްގީކުރަން މި ބޭންކުގެ ސަބަބުން މަގުފަހިވާނެކަމަށް ސައީދު ލިޔުއްވާފައި ވެއެވެ.
ޑިވެލޮޕްމެންޓު ބޭންކުގެ އިތުރު ބޭނުންތަކުގެ ތެރޭގައި:
- ގުދުރަތީ މުއްސަނދިކަން ދަމަހައްޓައި، އަންނަން އޮތް ޖީލުތަކަށް މަންފާވާނެ ފަދައިން ގުދުރަތީ މުއްސަނދިކަން ރައްކާތެރިކުރުން
- ސަރަހައްދީ އަދި ފަރުދީ ތަނަވަސްކަމުގެ ފަރަގު ކުޑަކުރުން
- ދައުލަތުގެ ދަރަނި އަނބުރާ ދެއްކުމާއި ދަރަނީގެ ބުރަ އަންނަން އޮތް ޖީލުތަކަށް ލުއިކުރުން
- ޓޫރިޒަމް ސިނާއަތުގެ އިންފްރާސްޓްރަކްޗާ ބާނުވެ ހިފެހެއްޓުން
- ދައުލަތުން ހަރަދުކޮށްފައިވާ އުމުރާނީ ވަސީލަތްތަކަށް ބޭނުންވާ މަރާމާތާއި ބެލެހެއްޓުން
- ރަނގަޅު ފެންވަރުގެ ބޯހިޔާވައްސާއި ވަޒަންވެރިވާނެ ޒަމާނީ މާހައުލުތައް އުފެއްދުން
ރާއްޖެއަށް ޑިވެލޮޕްމެންޓު ބޭންކެއްގެ ބޭނުންތެރިކަން ބޮޑުވާ ސަބަބުތަކުގެ ތެރޭގައި އެ މިނިސްޓްރީން ފާހަގަކުރީ ރާއްޖޭގެ ގުދުރަތީ މުއްސަނދިކަން އަންނަން އޮތް ޖީލުތަކަަށް ވާސިލުކޮށްދިނުމާއި، ސަރަހައްދީ އަދި ފަރުދީ ތަނަވަސްކަމުގެ ފަރަގު ކުޑަކުރުމާއި، މަންފާއެއް ނުލިބި ގިނަ ދުވަސްވެފައިވާ ރަށްރަށާއި ފަޅުތައް ތަރައްގީކުރުން ފަދަ ކަންކަމެވެ.
މީގެ އިތުރުން، ދިވެހިރާއްޖޭގައި ލޯކަލް ކަރަންސީ ސެޓްލްމަންޓް ތައާރަފުކުރުމަށް މަސައްކަތްތަކެއް ކުރަމުންދާ ކަމަށްވެސް މިނިސްޓަރު ހާމަކުރެއްވި އެވެ. މިކަމުގެ ސަބަބުން ދިވެހިރާއްޖޭގެ މާލީ ދާއިރާ އިތުރަށް ހަރުދަނާވެ، ބައިނަލްއަގުވާމީ ފެންވަރުގައި ވާދަކުރެވޭ ފެންވަރަށް ކުރިއަރައިގެންދާނެ ކަމަށް މިނިސްޓަރު އުންމީދުކުރައްވާ ކަމަށް ވިދާޅުވި އެވެ.
މިނިސްޓްރީން އިތުރަށް ބުނީ ކޮމާޝަލް ބޭންކިންގެ ފައިސާ ޖުމްލަ ގޮތެއްގައި ކުރު އަދި މެދު ރާސްތާގެ ދަރަންޏަށް އަމާޒުވުމުގެ ސަބަބުން އިގްތިސާދު ފުޅާކުރުމުގެ ޖާގައެއް ނުލިބޭ ކަމަށެވެ. ނަމަވެސް ޑިވެލޮޕްމަންޓް ބޭންކުން ފައިސާ ހަމައެކަނި ދަރަނީގެ ގޮތުގައި ދޫކުރުމުގެ ބަދަލުގައި މާލީ އަދި ފަންނީ އެހީތެރިކަން ފޯރުކޮށްދޭނެ އާ ގޮތްތަކެއް ތައާރަފްކުރާނެ ކަމަށެވެ.
ރައީސްއަށް ލިބިވަޑައިގަންނަވާ ބާރުގެ ދަށުން ޑިވެލޮޕްމެންޓު ބޭންކު އުފެއްދެވީ މިދިޔަ މެއިގަ އެވެ. އަދި ޖުލައިގައި އެ ބޭންކުގެ އޮޕަރޭޝަންތައްކަށް ބޭނުންވާ ލައިސަންސް ހޯދުމަށް އެމްއެމްއޭއަށް ހުށަހެޅިއިރު، އޮގަސްޓުގައި އެ ބޭންކުގެ ބޯޑަށް ބޭފުޅުން ވަނީ އައްޔަންކޮށްފަ އެވެ.
ރާއްޖޭގައި ފުރަތަމަ ފަހަރަށް ޑިވެލޮޕްމަންޓް ބޭންކެއް ހިންގުމަށް ޑިވެލޮޕްމަންޓް ބޭންކް އޮފް މޯލްޑިވްސް ލިމިޓެޑް (ޑީބީއެމްއެލް)އަށް ލައިސެންސް ދޫކުރީ މިމަހުގެ 13 ވަނަ ދުވަހު އެވެ. ރާއްޖޭގެ އުމްރާނީ ތަރައްގީއަށް ފައިނޭންސް ކުރުމަށް ޑިވެލޮޕްމަންޓު ބޭންކެއް ގާއިމްކުރުމަކީ ރައީސް ޑރ. މުހައްމަދު މުއިއްޒުގެ ރިޔާސީ ވައުދުފުޅެކެވެ.
