މި ނިޒާމް ހަނިމާދޫ ސްކޫލްގައި ގާއިމްކުރީ އެ ސްކޫލްގައި "ސްކޫލް ހައިޑްރޮޕޯނިކްސް ޕްރޮގްރާމް"ގެ ނަމުގައި އިފްތިތާހު ކުރި ޕްރޮގްރާމްގެ ދަށުންކަމަށް އެގްރިކަލްޗާ މިނިސްޓްރީން ބުނެ އެވެ.
މި ޕްރޮގްރާމްގެ ދަށުން ހަނިމާދޫ ސްކޫލްގައި ވަނީ ދަރިވަރުންނަށް މަސައްކަތުގެ ތަޖުރިބާ ހާސިލް ކުރެވޭނެ ގޮތަށް ކުޑަ ގްރީންހައުސްއެއް ގާއިމްކޮށްދީފަ އެވެ. އަދި މި ގްރީންހައުސްގައި ގާއިމްކުރި ހައިޑްރޮޕޯނިކްސް ސިސްޓަމް މެދުވެރިކޮށް ފަތްޕިލާވެލީގެ ބާވަތްތަކާއި ކިޔުކަންބާ އާއި މެލަން ފަދަ ބާވަތްތައް ހެއްދޭނެ ކަމަށްވެސް އެގްރިކަލްޗާ މިނިސްޓްރީން ބުނެ އެވެ.
އޭގެއިތުރުން ޕްރޮގްރާމަކީ ދަނޑުވެރިންގެ ދުވަހާއި ދުނިޔޭގެ ކާބޯތަކެތީގެ ދުވަސް ފާހަގަކުރުމުގެ ގޮތުން ކުރިއަށް ގެންދާ ހަރަކާތްތަކުގެ ތެރެއިން އެއް ހަރަކާތް ކަަމަށްވާއިރު މި ޕްރޮގްރާމްގެ މައިގަނޑު މަގްސަދަކީ ދަރިވަރުންގެ މެދުގައި ދަނޑުވެރިކަމުގެ މަސައްކަތްތަކަށް ލޯބި އުފައްދައި، ދަނޑުވެރިކަމަށް ޝައުގުވެރިވާ ޒުވާން ޖީލެއް އުފެއްދުން ކަމުގައި އެގްރިކަލްޗާ މިނިސްޓްރީން ބުނެ އެވެ.
މި ޕްރޮގްރާމް އިފްތިތާހުކޮށްދެއްވީ އެގްރިކަލްޗާ މިނިސްޓްރީގެ ޑެޕިޔުޓީ މިނިސްޓަރު އިސްމާއީލް މުހައްމަދު އެވެ. އަދި މި ޕްރޮގްރާމްގައި ސްކޫލްގެ ދަރިވަރުންނާއި މުވައްޒަފުންގެ އިތުރުން ސްކޫލްގެ ޕީޓީއޭ މެންބަރުން ހިމެނޭ ގޮތަށް ޖުމްލަ 50 ބައިވެރިން ބައިވެރިވިކަަމަށް އެގްރިކަލްޗާ މިނިސްޓްރީން ބުނެ އެވެ.
މިފަދަ ޕްރޮގްރާމްތަކަކީ ދަރިވަރުންގެ މަދުރަސީ ހަޔާތުގައި ވޭތުކުރާ ދުވަސްވަރު ދަނޑުވެރިކަމުގެ ތަޖުރިބާއާއި އިލްމު ލިބިދެވޭނެ މަގު ތަނަވަސްކުރުމަށް އެޅޭ މުހިންމު ފިޔަވަޅެއްކަމަށާއި މިއީ ރާއްޖޭގެ ދަނޑުވެރިކަމުގެ ކުރިމަގު އުޖާލާ ކުރުމަށް އެޅޭނެ މުހިންމު ފިޔަވަޅެއްކަމަށް އެގްރިކަލްޗާ މިނިސްޓްރީން ފާހަގަކުރެ އެވެ.
