މި މައްސަލައިގައި ޖަލަށް ލީ ފުވައްމުލަކު މީހެއް ކަމަށްވާ މުހައްމަދު ހަނީޝް ހަފީޒެވެ.
ފުލުހުން ބުނާ ގޮތުގައި މި ހާދިސާ ހިނގާފައިވަނީ މިދިޔަ އަހަރުގެ އޮކްޓޯބަރު މަހުގެ 27 ވަނަ ދުވަހުގެ ހެނދުނު 8:20 ހާއިރުއެވެ. އެ ވަގުތު އަފާސްމާޓް ފިހާރައިގެ ރެކުގައި ބަހައްޓާފައި ހުރި ހަތަރު ރެޑްބުލް ދަޅު ހަނީޝް ވަގަށް ނަގާފައިވާ ކަމަށް ދައުލަތުން ދައުވާ ކުރިއެވެ.
ކޯޓުން މައްސަލަ ބެލުމަށްފަހު ނިންމީ ހަނީޝްގެ މައްޗަށް ކުރެވުނު ދައުވާ ޝައްކެއް ނެތް މިންވަރަށް ސާބިތުވާ ކަމަށެވެ. އެހެންކަމުން، ވައްކަން ކުރުމުގެ ކުށަށް އޭނާއަށް އެއް މަހާއި 12 ދުވަހުގެ ޖަލު އަދަބެއް ކަނޑައެޅިއެވެ.
މިފަދަ ކުދި ވައްކަމުގެ މައްސަލަތައް އިތުރުވަމުން ދާކަމަށް ފުލުހުން ބުނެއެވެ. އަދި މިކަމާ ގުޅިގެން ފިހާރަތަކުގެ ވެރިންނަށް ސަމާލުވުމަށް އިރުޝާދު ދީފައިވެއެވެ. އަދި ފިހާރަތަކުގައި ސީސީޓީވީ ކެމެރާ ބެހެއްޓުމަށާއި، މުދާ ރައްކާތެރިކަމާއެކު ބެހެއްޓުމަށް ވެސް އިރުޝާދު ދީފައިވެއެވެ.
