މި މަޝްވަރާ ބައްދަލުވުމުގައި މަސްވެރިކަމާ ބެހޭ މިނިސްޓްރީގެ އިސް ބޭފުޅުންނާއި، އިންޑިއާ ހައި ކޮމިޝަންގެ ވެރިންނާއި އިންޑިއާ އެގްޒިމް ބޭންކުގެ އިސް ބޭފުޅުން ބައިވެރިވިއެވެ. މަސްވެރިކަމާ ބެހޭ މިނިސްޓްރީން ބުނީ މި ބައްދަލުވުމުގެ މައިގަނޑު މަގްސަދަކީ ފެލިވަރުގައި އަޅާ މަސް ރައްކާ ކުރާ ފެސިލިޓީގެ މަސައްކަތް އަވަސްކޮށް، މަސްވެރިންނަށް ހިދުމަތް ދިނުން އަވަސް ކުރުން ކަމަށެވެ.
މި މަޝްރޫއުގެ ދަށުން ފެލިވަރުގައި ގާއިމުކުރެވޭ 4000 ޓަނުގެ ކޯލްޑް ސްޓޯރޭޖަކީ ރާއްޖޭގައި މިހާތަނަށް ގާއިމުކުރެވޭ އެންމެ ބޮޑު ކޯލްޑް ސްޓޯރޭޖް އެވެ. މީގެ އިތުރުން، ދުވާލަކު 200 ޓަނުގެ މަސް ފްރީޒްކުރެވޭ ބްރައިން ފްރީޒިންގ ފެސިލިޓީއަކާއި މަސް ފިނިކޮށް ބަހައްޓާ 80 ޓަނުގެ ރެފްރިޖަރޭޓަޑް ސީ ވޯޓަރ ސިސްޓަމެއްވެސް ގާއިމުކުރެވޭނެއެވެ.
މި މަޝްރޫއު ނިމުމުން ރާއްޖޭގެ އުތުރުގައި މަސްވެރިކަން ކުރާ މަސްވެރިންނަށް ބޮޑެތި ފަސޭހަތަކެއް ލިބިގެންދާނެ ކަމަށް މަސްވެރިކަމާ ބެހޭ މިނިސްޓްރީން ވިދާޅުވިއެވެ. މި މަޝްރޫއުގެ މަސައްކަތް ކުރިއަށްދަނީ އިންޑިއާގެ އެގްޒިމް ބޭންކުގެ ލޯނު ފައިނޭންސްގެ ދަށުންނެވެ. މަސައްކަތް ހަވާލުކޮށްފައިވަނީ އިންޑިއާގެ ރައިނެކް އިންޑިއާ ލިމިޓެޑާއެވެ.
