މިނިސްޓަރު މިހެން ވިދާޅުވީ ފިލިޕީންސްގެ މެނީލާގައި ކުރިއަށްދާ ޑިޒާސްޓަރ ރިސްކް ރިޑަކްޝަން އޭޝިއާ ޕެސިފިކް މިނިސްޓީރިއަލް ކޮންފަރެންސްގައި ވާހަކަފުޅު ދައްކަވަމުންނެވެ.
މިނިސްޓަރު ވިދާޅުވި ގޮތުގައި މޫސުމީ ކާރިސާތަކުގެ ނުރައްކާ ކުޑަކުރުމަށް ރާއްޖޭން އެކުލަވާލާފައިވާ ފަސް އަހަރުގެ ގައުމީ ޕްލޭނެއް އަންނަ މަހުން ފެށިގެން ތަންފީޒުކުރަން ފަށާނެއެވެ. މި ޕްލޭނަކީ މޫސުމަށް އަންނަ ބަދަލުތަކުގެ ސަބަބުން ދިމާވާ ގޮންޖެހުންތަކަށް ހައްލު ހޯދުމަށް ރާއްޖެއިން ކުރަމުންދާ މަސައްކަތްތަކުގެ ތެރެއިން އެއް މަސައްކަތް ކަމަށް މިނިސްޓަރު ފާހަގަކުރެއްވިއެވެ.
ރާއްޖެއަކީ މޫސުމަށް އަންނަ ބަދަލުތަކުގެ އަސަރު ވަރަށް ބޮޑަށް ކުރާ ގައުމެއްކަން ފާހަގަކުރައްވަމުން، މިކަމުގެ ސަބަބުން ކުރާ އަސަރު ކުޑަކުރުމަށް ރާއްޖެއިން އަބަދުވެސް ވަކާލާތު ކުރަމުންދާ ކަމަށް މިނިސްޓަރު ވިދާޅުވިއެވެ. އަދި ރައީސް ޑރ. މުހައްމަދު މުއިއްޒުގެ ސަރުކާރުން ވެސް މޫސުމީ ކަންކަމާ ގުޅޭގޮތުން ގިނަ މަސައްކަތްތަކެއް ކުރަމުންދާކަން މިނިސްޓަރު ފާހަގަކުރެއްވިއެވެ.
މީގެ އިތުރުން، މޫސުމީ ކާރިސާތަކުން އަރައިގަތުމަށް އެއްވެސް ގައުމެއް ބާކީނުކޮށް، އެންމެން އެކުގައި މަސައްކަތްކޮށް އެއްބަޔަކު އަނެއް ބަޔަކަށް އެހީތެރިވުމަކީ އެންމެންގެ ވެސް ޒިންމާއެއްކަމަށް މިނިސްޓަރު ވިދާޅުވިއެވެ. މި ކަމަކީ ހަމައެކަނި ވަކި ގައުމަކަށް ނުވަތަ ސަރަހައްދަކަށް ކުރިމަތިވާ މައްސަލައެއް ނޫންކަމާއި، މުޅި ދުނިޔެއަށް ކުރިމަތިވެފައިވާ ގޮންޖެހުމެއްކަން ފާހަގަކުރެއްވިއެވެ.
