މި މައްސަލައިގައި ހައްޔަރުކުރެވުނީ 41 އަހަރުގެ މުހައްމަދު ޝޯއިބް އާއި އޭނާގެ އަނބިކަނބަލުން 38 އަހަރުގެ އައިޝާއެވެ.
ފުލުހުން ބުނާ ގޮތުގައި މި ދެމަފިރިން ހައްޔަރުކުރެވުނީ ރާއްޖެއަށް މަސްތުވާތަކެތި ޓްރެފިކް ކުރުމުގެ ކުށުގެ ތުހުމަތުގައެވެ. އެ ދެމީހުން ރާއްޖެ އައި އިރު ލަގެޖުގެ ތެރެއިން ފޮރުވާފައި ހުރި 2 ކިލޯގެ މަސްތުވާތަކެތި ފެނިފައިވާ ކަމަށް ފުލުހުންގެ އިންވެސްޓިގޭޝަން އޮފިސަރު ކްރިމިނަލް ކޯޓުގައި ވިދާޅުވިއެވެ.
ކްރިމިނަލް ކޯޓުގެ ގާޒީ އިބްރާހިމް ޒިހުނީ ނިންމެވީ އެ ދެމީހުން ވެސް ތިން ދުވަހަށް ކަސްޓޯޑިއަލް ޖަލެއްގައި ބަންދުކުރުމަށެވެ. އަމުރުގައިވާ ގޮތުން ބަންދަށް ކުރު މުއްދަތެއް ދީފައި ވަނީ އެ ދެމީހުންނަށް ހިންދީ ބަސް އެނގޭ ތަރުޖަމާނަކު ހަމަޖެހިފައި ނުވުމުންނެވެ. ނަމަވެސް، އިންވެސްޓިގޭޝަން އޮފިސަރަށް ހިންދީ ބަސް އެނގޭތީ، ބަންދު މަޖިލީހުގައި ހިނގައި ދިޔަ ކަންތައްތައް އެ ދެމަފިރިންނަށް ތަރުޖަމާކޮށްދީފައިވަނީ އޭނާ މެދުވެރިކޮށެވެ.
މި މައްސަލައިގައި ފުލުހުން ވަނީ އެ ދެމީހުން ކުށް ކުރި ކަމަށް ތުހުމަތު އުފެދޭ ވަރަށް ހެކި ހުށަހަޅައިފައެވެ. އަދި ސީނަށް ދިޔަ ފުލުހުންގެ ބަޔާން ވެސް ކޯޓަށް ހުށަހަޅާފައިވެއެވެ. އެ ދެމީހުންނަށް ވެސް ވަނީ ވަކީލަކު ހަމަޖެއްސުމުގެ ފުރުސަތު އޮތް ކަން އަންގައިފައެވެ. މި މައްސަލައިގެ ތަހުގީގު ކުރިއަށްދާ ކަމަށް ފުލުހުން ބުނެއެވެ.
