މި ބައްދަލުވުމުގައި މައިގަނޑު ގޮތެއްގައި މަޝްވަރާ ކުރެވުނީ މާލެ ސަރަހައްދުގެ ފެނާއި ނަރުދަމާގެ ދުމަތް އިތުރަށް ފުޅާކޮށް، ރައްޔިތުންނަށް ދެވޭ ހިދުމަތުގެ ފެންވަރު ރަނގަޅު ކުރުމަށް ކުރެވިދާނެ ކަންތައްތަކާ ބެހޭގޮތުން ކަމަށް އެންވަޔަރަމަންޓް މިނިސްޓްރީން ބުނެ އެވެ.
އެންވަޔަރަމަންޓް މިނިސްޓްރީން ބުނިގޮތުގައި މިހާރު ކުރިއަށްދާ ފެނާއި ނަރުދަމާގެ މަޝްރޫއުތަކާ ކުރިއަށް އޮތް ތަނުގައި ރޭވިފައިވާ ތަރައްގީގެ މަޝްރޫއުތަކާ ބެހޭގޮތުން ވެސް މިއަދު މަޝްވަރާ ކުރި އެވެ.
މި މަޝްވަރާ ބައްދަލުވުމުގައި ބައިވެރިވެ ވަޑައިގަތީ އެންވަޔަރަމަންޓް މިނިސްޓަރު ތޯރިގް އިބްރާހީމް އާއި މޯލްޑިވްސް ވޯޓާ އެންޑް ސުވަރޭޖް ކޮމްޕެނީ (އެމްޑަބްލިއުއެސްސީ) ގެ މެނޭޖިން ޑިރެކްޓަރު އަބްދުލް މަތީން އެވެ.
މިނިސްޓަރު ތޯރިގަ އިބްރާހީމް ވިދާޅުވީ މާލެ ސަރަހައްދުގެ އާބާދީ އިތުރުވަމުން ދާއިރު، ފެނާއި ނަރުދަމާގެ ހިދުމަތް ފުޅާ ކުރުމަކީ ސަރުކާރުގެ އިސް އަމާޒެއް ކަމަށެވެ. އަދި މި ދާއިރާއިން އެމްޑަބްލިއުއެސްސީން ކުރަމުންދާ މަސައްކަތްތަކަށް މިނިސްޓަރު ޝުކުރު އަދާ ކުރެއްވިއެވެ.
އެމްޑަބްލިއުއެސްސީގެ އެމްޑީ އަބްދުލް މަތީން ވިދާޅުވީ ކުންފުނިން ގެންގުޅޭ އާ ޓެކްނޮލޮޖީތަކާއި އިންވެސްޓްމަންޓްތަކުގެ ސަބަބުން ހިދުމަތުގެ ފެންވަރު އިތުރަށް ރަނގަޅުވަމުންދާ ކަމަށެވެ. އަދި ކުރިއަށް އޮތްތަނުގައި ވެސް އެ ދާއިރާ ތަރައްގީ ކުރުމަށް ގިނަގުނަ މަސައްކަތްތަކެއް ކުރާނެ ކަމުގެ ޔަގީންކަން މަތީން ދެއްވިއެވެ.
މި ބައްދަލުވުމަކީ މާލެ ސަރަހައްދުގެ ފެނާއި ނަރުދަމާގެ ހިދުމަތް އިތުރަށް ހަރުދަނާ ކުރުމަށް އެޅޭ މުހިންމު ފިިޔަވަޅެއް ކަމުގައި ބެލެވޭކަމަށް އެންވަޔަރަމަންޓް މިނިސްޓްރީން ބުނެ އެވެ.
