ޑޯޕިން މައްސަލައެއްގައި ހަތަރު އަހަރަށް ސަސްޕެންޑް ކުރުމަށް ފަހު، ފަހުން އެ އަދަބު ދޮޅު އަހަރަށް ލުއިކޮށްފައިވާ ޕޮގްބާ އަންނަނީ އެނބުރި ކުޅުމުގެ ތެރެއަށް އަންނަން މަސައްކަތް ކުރަމުންނެވެ.
އުމުރުން 31 އަހަރުގެ ޕޮގްބާގެ އެޕީލް ކާމިޔާބުވެ، އޭނާގެ އަދަބު ލުއިކޮށްދިނުމުން އަންނަ އަހަރުގެ މާރިޗު މަހު ޕޮގްބާގެ ސަސްޕެންޝަން ނިމި އަލުން އެނބުރި ކުޅުމަށް އާދެވޭނެއެވެ.
ސްކައި ސްޕޯޓްސްއަށް ދިން އެކްސްކްލޫސިވް އިންޓަވިޔުއެއްގައި ޕޮގްބާ ބުނީ، އޭނާ ބޭނުން ކުރި ސަޕްލިމެންޓެއްގެ ސަބަބުން ޑޯޕިން ޓެސްޓުން ފެއިލްވި ފެއިލްވުމަކީ އޭނާ ގަސްދުގައި މަނާ ބޭސް ބޭނުންކުރުމަށް ކުރި ކަމެއް ނޫން ކަމަށެވެ. އެހެންނަމަވެސް އެކަމުގެ ފުރިހަމަ ޒިންމާ އުފުލާ ކަމަށް ޕޮގްބާ ބުންޏެވެ.
ޕޮގްބާ ބުނި ގޮތުގައި މި ވަގުތު އޭނާ އެންމެ ބޭނުންވަނީ އަލުން އެނބުރި ޓީމާއެކު ޕްރެކްޓިސް ކުރަން ފަށާށެވެ. ސަސްޕެންޑް ކުރި ފަހުން އޭނާ މުޅިންވެސް ފިޓްނަސް ހިފެހެއްޓުމުގެ ގޮތުން ޓްރެއިނިންތައް ހަދަމުން އަންނަނީ އެކަންޏެވެ. އޭނާ ބުނި ގޮތުގައި ވީ އެންމެ އަވަހަކަށް ޔުވެންޓަސްއާއެކު ޕްރެކްޓިސްތައް ފަށަން އޭނާ ބޭނުންވެއެވެ. އަދި އެއަށް ފަހު އޭނާގެ ޓާގެޓަކީ އަލުން ފްރާންސްގެ ގައުމީ ޓީމަށް ކުޅުމެވެ. ޕޮގްބާއަކީ 2018 ވަނަ އަހަރު ފްރާންސުން ވޯލްޑްކަޕް ކާމިޔާބު ކުރިއިރު، އެ ޓީމުގައި މުހިއްމު ދައުރެއް ކުޅުނު ކުޅުންތެރިއެކެވެ.
