އިޒްރޭލްގެ އަސްކަރިއްޔާއާ ހަވާލާދީ ޖެރޫސަލްމަ ޕޯސްޓުން ބުނީ ޔަހްޔާ ސިންވާރު އަވަހާރަކޮށްލާފައިވާ ކަމަށް ބުނެ އިޒްރޭލްގެ އަސްކަރީ އޮފިޝަލުން އުފާފާޅު ކުރަމުންދާ ކަމަށެވެ.
ނަމަވެސް މިކަމާ ގުޅޭގޮތުން ހަމާސް ޖަމާއަތުން ރަސްމީކޮށް އެއްޗެއް ބުނެފައެއް ނުވެ އެވެ.
61 އަހަރުގެ ސިންވާރު ހަމާސްގެ ލީޑަރު ކަމަށް ހަމަޖެއްސީ އެ މަގާމުގައި ހުންނެވި އިސްމާއިލް ހަނިއްޔާ އަވަހާރަކޮށްލުމާ ގުޅިގެންނެވެ. ހަނިއްޔާ އަވަހާރަކޮށްލީ އީރާންގެ އާ ރައީސް މަގާމުގެ ހުވާ ކުރެއްވުމުގެ ރަސްމިއްޔާތަށް ވަޑައިގެން އުޅުއްވަނިކޮށް އޭނާ ހުންނެވި ގެޔަށް ހަމަލާ ދީގެންނެވެ.
ސިންވާރަކީ އިޒްރޭލުގެ "ވޯންޓެޑް ލިސްޓު"ގެ އެންމެ ކުރީގައި އޮތް ފަރާތެވެ. އިޒްރޭލުން ތުހުމަތު ކުރާ ގޮތުގައި އޮކްޓޫބަރު 7 ގައި ހަމާސް އިން އިޒްރޭލަށް ދިން ހަމަލާގެ މޭސްތިރިޔަކީ ސިންވާރެވެ. އޭނާ އަކީ އެމެރިކާގެ ޓެރަރިސްޓުންގެ ލިސްޓުގައި ވެސް ހިމެނޭ ފަރާތެކެވެ.
