އޭޝިއާގެ 17 އަހަރުން ދަށުގެ މުބާރާތުގެ ކޮލިފައިންގައި މިއަދު ރާއްޖޭން ބޫޓާނާ އެއްވަރު ކުރީ ދެ ލަނޑު ދެ ލަނޑުންނެވެ.
މި މެޗު އެއްވަރުވީ، ބޫޓާނުން ދެ ލަނޑު ޖަހާފައިވަނިކޮށް ދިވެހި ޓީމުން ފަހަތުން އަރައި ޖެހި ދެ ލަނޑާއެކުއެވެ. ދިވެހި ޓީމުގެ ދެ ލަނޑުވެސް ޖެހީ މުހައްމަދު އިލާން އިމްރާންއެވެ.
ކޮލިފައިން މެޗުތައް ކުޅެނީ ޗައިނާގެ ޑާލިއާން ޔޫތު ފުޓްބޯލް ޓްރެއިނިން ދަނޑުގައެވެ. ފަސް ޓީމު ވާދަކުރާ މި ކޮލިފައިން ގްރޫޕްގައި ރާއްޖެ ކުޅޭ ދެ ވަނަ މެޗުގައި މާދަމާ ނޫން އަނެއް ދުވަހު ބައްދަލުކުރާނީ ބަހުރޭންއާ އެވެ. ތިން ވަނަ މެޗުގައި، ބުދަ ދުވަހު ދެކުނު ކޮރެއާއާ ކުޅުމަށް ފަހު، ހުކުރު ދުވަހު ގްރޫޕްގެ ފަހު މެޗުގައި ޗައިނާއާ ބައްދަލުކުރާނެ އެވެ.
ރާއްޖޭން 2022 ވަނަ އަހަރު ކުޅުނު 17 އަހަރުން ދަށުގެ ކޮލިފައިން ނިންމާލީ ޕޮއިންޓެއް ނުލިބި ހަތަރު މެޗުން ބަލިވެގެންނެވެ.
