މިއަދު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމެއްގައި އުޝާމް ވިދާޅުވީ ދެ ބިލިއަނެއްހާ ރުފިޔާ ނިޒާމުގެ ތެރެއަށް ނުވައްދައި ހުރިކަން ފާހަގަކުރެވިފައިވާ ކަމަށެވެ. އަދި އެ ދެ ބިލިއަން ރުފިޔާ މި އަހަރުގެ ބަޖެޓުގައި ރެކޯޑުކޮށްފިނަމަ އެއީ ގާނޫނާ ހިލާފު ކަމަކަށް ވާނެ ކަމަށް ވެސް އޭނާ ވިދާޅުވިއެވެ.
އުޝާމް އިތުރަށް ވިދާޅުވީ ކުރީގެ ސަރުކާރުން ކޮންމެ އަހަރަކުވެސް ޖެހިގެން އަންނަ އަހަރުގެ ބަޖެޓާއެކު ކުރިން ކުރި ހަރަދުތައް ސަޕްލިމެންޓަރީ ބަޖެޓެއްގެ ގޮތުގައި ހުށަހަޅަމުން ދިޔަ ކަމަށެވެ. މިއީ ގާނޫނުއަސާސީއާ ހިލާފު ކަމެއްކަމަށް އޭނާ ފާހަގަކުރެއްވިއެވެ.
މި މައްސަލަ މިހާރު ވަނީ އޮޑިޓަރ ޖެނެރަލް އޮފީހަށް ހުށަހަޅާފައެވެ. އަދި އެ އޮފީހުން ކުރިއަށް އޮތް ދެތިން ހަފުތާ ތެރޭގައި ރިޕޯޓެއް ތައްޔާރުކޮށް ހުށަހެޅުމުން، އެ ރިޕޯޓުގެ މައްޗަށް ބިނާކޮށް ދެން ކަންކުރަންވީ ގޮތެއް ސަރުކާރުން ނިންމާނެ ކަމަށް ބަންޑާރަނައިބު ވިދާޅުވިއެވެ.
އުޝާމް އިތުރަށް ވިދާޅުވީ ދައުލަތުގެ މާލީ ހިސާބުތައް ބެލެހެއްޓުމުގައި ވަރަށް ބޮޑެތި ގޯސްތަކެއް ހަދާފައިވާ ކަމަށާއި، މިފަދަ ކަންކަމާ ގުޅިގެން ގާނޫނީ ގޮތުން އަޅަންޖެހޭ ފިޔަވަޅުތައް އަޅާނެ ކަމަށެވެ.
