އަމީރު މިހެން ވިދާޅުވެފައި މިވަނީ މިދިޔަ ސަރުކާރުން ދެ ބިލިއަން ރުފިޔާ ރެކޯޑް ނެތުމުން އެ މައްސަލަ ބަލަމުންދާކަމަށް އިއްޔެ ސަރުކާރުން ހާމަކުރުމުން އެ ވާހަތަކަށް ރައްދުދެއްވައެވެ.
އިިއްޔެ ރައީސް އޮފީހުގައި ބޭއްވި ނޫސްވެރިންގެ ބައްދަލުވުމެއްގައި ފިނޭންސް މިނިސްޓާރު މޫސާ ޒަމީރު ވިދާޅުވީ ހަފުތާއަކު އެއްފަހަރު ފިނޭންސް މިނިސްޓްރީން އާންމުކުރަމުން އައި ދައުލަތުގެ ހިސާބުތައް ޖޫން މަހުން ފެށިގެން އާންމުނުކުރަނީ ކުރީ ސަރުކާރުގައި ދައުލަތުގެ މާލީ ހިސާބުތައް ބެލެހެއްޓުމުގައި ބޮޑެތި ގޯސްތަކެއް ހަދާފައިވާތީކަމަށެވެ.
އެގޮތުން ދައުލަތުގެ މާލީ ހިސާބުތައް ރެކޯޑުކުރުމުގައި ބޭރު ފަރާތްތަކުން ފަންޑުކޮށްގެން ހިންގާ މަޝްރޫއުތަކަށް ފައިސާ ދޫކޮށް ހަރަދުކުރި ނަމަވެސް އެ ފައިސާ ދޫކުރި އަހަރުގެ ހިސާބުކިތާބުގައި އެ ހަރަދުތައް ހިމަނާފައިނުވާކަމަށް ޒަމީރު ވިދާޅުވިއެވެ. އަދި އެ ހަރަދުތައް ހިމަނާފައިވަނީ ޖެހިގެން އައި އަހަރުގެ ހިސާބުތަކުގައިކަމަށެވެ.
މިކަމާއި ގުޅުވާ ބަންޑާރަ ނައިބު އަހްމަދު އުޝާމް ވިދާޅުވީ ދެ ބިލިއަނެއްހާ ރުފިޔާ ނިޒާމުގެ ތެރެއަށް ނުވައްދައި ހުރިކަން ފާހަގަކުރެވިފައިވާކަމަށާއި އެ ދެ ބިލިއަން ރުފިޔާ މި އަހަރުގެ ބަޖެޓުގައި ރެކޯޑުކޮށްފިނަމަ އެއީ ގާނޫނާ ހިލާފު ކަމަކަށް ވާނެ ކަމަށް ވެސް އުޝާމް ވިދާޅުވިއެވެ.
ސަރުކާރުގެ މިވާހަކަތަކަށް ރައްދުދެއްވަމުން މިދިޔަ ސަރުކާރުގެ ފިނޭންސް މިނިސްޓަރު އިބްރާހިމް އަމީރު ވިދާޅުވީ މި ސަރުކާރުން ސިޔާސީ މީހުންނަށް ކުރި ހަރަދާއި އިސްރާފުތައް ގިނަވުމުން ހަގީގަތް އޮލޫވާލަން މަސައްކަތް ކުރައްވަނީކަމަށެވެ. އަދި އަހަރެއް ވެގެންދާއިރު ތަރައްޤީގެ އެއްވެސް މަޝްރޫއެއް ހިންގިފައި ނުވާކަމަށާއި އޮޅުވާލުންތައް އޮޅުވާ ނުލާވެސް ސަރުކާރުން ބޭނުންނަމަށް ސަޕްލިމެންޓަރީ ބަޖަޓެއް ހުށައެޅިދާނެކަމަށެވެ.
އަމީރު ވިދާޅުވީ ކުރީ ސަރުކާރުން ކޮށްފައިވާ ހުރިހާކަމެއް ބަލާނެ ވަރަކަށް ބަލާފައިވެސް ތަފާސް ހިސާބުތައް އާއްމުކުރާހާ ދުވަސް ވެއްޖެކަމަށެވެ. އެހެންކަމުން ބަހަނާ ނުދައްކާ ހިސާބުތައް އާއްމުކުރުމަށް އަމީރު ވަނީ ގޮވާލައްވާފައެވެ.
މި އަހަރުގެ ޖޫން މަހުގެ 20 ވަނަ ދުވަހުން ފެށިގެން ސަރުކާރުގެ ހަރަދުބަރަދާއި އާމްދަނީގެ ތަފުސީލުތައް ހާމަކުރުން ވަނީ ހުއްޓާލާފައެވެ. އޭރު ސަރުކާރުން ބުނީ ހިސާބުތަކުގެ ސައްހަކަން ކަަށަވަރުކުރުމަށްފަހު ޖުލައި މަހުގެ ފަހު ހަފުތާއިން ފެށިގެން އަލުން ހިސާބުތައް ޝާއިއުކުރަން ފަށާނެ ކަމަށެވެ. އެހެންނަމަވެސް މިހާތަނަށް އައިއިރުވެސް އެއްވެސް ހިސާބެއް އާއްމުކޮށްފައެއް ނުވެއެވެ.
އިއްޔެ ބަންދާރަ ނައިބު އުޝާމް ވިދާޅުވީ ހިސާބުތަކުގެމައްސަލަ މިހާރު އޮޑިޓަރ ޖެނެރަލް އޮފީހަށް ހުށަހަޅާފައިވާކަމަށެވެ. އަދި އެ އޮފީހުން ކުރިއަށް އޮތް ދެތިން ހަފުތާ ތެރޭގައި ރިޕޯޓެއް ތައްޔާރުކޮށް ހުށަހެޅުމުން، އެ ރިޕޯޓުގެ މައްޗަށް ބިނާކޮށް ދެން ކަންކުރަންވީ ގޮތެއް ސަރުކާރުން ނިންމާނެ ކަމަށް ބަންޑާރަނައިބު އުޝާމް ވިދާޅުވިއެވެ.
