ކަސްޓަމްސްގެ ތަފާސް ހިސާބުތަކުން އިތުރަށް ދައްކާ ގޮތުގައި ކޮންމެ އަހަރަކުވެސް 10،000 އަށް ވުރެ ގިނަ އެއްގަމު އުޅަނދު ރާއްޖޭގައި އަލަށް ރަޖިސްޓަރީކުރެއެވެ. މި އުޅަނދުތަކުގެ ތެރެއިން 90 ޕަސަންޓަކީ ސައިކަލެވެ. ރާއްޖެ އެތެރެކުރާ އުޅަނދުތަކުގެ ތެރެއިން ގިނަ އުޅަނދުތައް ދުއްވަނީ މާލެ ސަރަހައްދުގައެވެ.
މާލެ ސަރަހައްދަކީ ރާއްޖޭގެ އެންމެ ތޮއްޖެހުން ބޮޑު ސަރަހައްދެވެ. މާލޭގައި ލައްކައަށް ވުރެ ގިނަ އުޅަނދު ރަޖިސްޓަރީކޮށްފައިވާއިރު، ބައެއް އުޅަނދު ރަޖިސްޓަރީކޮށްފައިވަނީ ނުގަވާއިދުންނެވެ. ތޮއްޖެހުމުގެ މައްސަލަ ބޮޑުވެގެން ދިޔައީ މާލެއަށް ނުކަތާވަރަށް އުޅަނދުތައް ރަޖިސްޓަރީކުރުމާއި، ހަލާކުވުމުން ބޭނުން ނުކޮށް މަގުތަކަށް ދޫކޮށްލާ އުޅަނދުތަކުގެ އަދަދުތައްވެސް އިތުރުވުމުންނެވެ.
މި މައްސަލަ ހައްލުކުރުމަށް ސަރުކާރުން ވަނީ ފިޔަވަޅުތަކެއް އަޅަން ފަށާފައެވެ. އެގޮތުން، އެއްގަމު އުޅަނދު ރަޖިސްޓަރީކޮށްދޭނެ އަދަދާއި އުޅަނދު ބޭނުންކުރެވޭނެ މުއްދަތު ކަނޑައެޅުމުގެ ގަވާއިދަށް މިއަހަރުގެ މާރޗް މަހުގައި އިސްލާހެއް ގެނެސްފައިވެއެވެ. މި އިސްލާހުގެ ދަށުން، ރަށްރަށާއި ސިޓީތަކުގައި ނުވަތަ ވަކި ސަރަހައްދެއްގައި ބޭނުންކުރުމަށް އުޅަނދުތަކުގެ އަދަދު ކަނޑައަޅާނީ ކައުންސިލްތަކުން އެސެސްމަންޓެއް ހަދައި ވެހިކަލް ކެޕޭސިޓީ ދެނެގަތުމަށްފަހުގައެވެ.
