މި މަރުކަޒުތައް ގާއިމުކޮށްފައިވަނީ ކ. ހިއްމަފުށީގަޔާއި ހުޅުމާލޭގައެވެ.
އެންޑީއޭގެ ޗެއާޕާސަން ލުބުނާ ޒާހިރު ވިދާޅުވީ މި މަރުކަޒުތައް ގާއިމުކުރުމުގެ މަގުސަދަކީ މަސްތުވާތަކެތި ބޭނުންކުރާ މީހުންނާއި ޕެޑަލްކުރާ މީހުން ކުށުގެ ވެށިން ނަގައި، އެ މީހުންނަށް ފަރުވާ ދެވޭނެ ފެންވަރުގެ ތަނެއް ގާއިމުކުރުން ކަމަށެވެ. އަދި ގާނޫނުގައި ވެސް މިފަދަ ތަނެއް ހުންނަން ޖެހޭނެ ކަމަށް ބަޔާންކޮށްފައިވާ ކަމަށް އޭނާ ފާހަގަކުރެއްވިއެވެ.
އެންޑީއޭގެ އެކްޓިންގް ސީއީއޯ އަދި ދާހިލީ މިނިސްޓްރީގެ ޑެޕިއުޓީ މިނިސްޓަރު މުހައްމަދު ރަޝީދު ބުނީ މިހާރު އެންޑީއޭގެ 10 ސެންޓަރެއްގައި 1،500 ކުދިންނަށް ފަރުވާ ދެމުންދާ ކަމަށެވެ. މީގެ ތެރޭގައި ރެޒިޑެންޝަލް ސެންޓަރުގައި ތިބެގެން ފަރުވާ ހޯދާ ކުދިންނާއި މުޖުތަމައު ތެރޭގައި ތިބެގެން ފަރުވާ ހޯދާ ކުދިންނާއި ބޭސް ދީގެން ފަރުވާ ދޭ ކުދިން ހިމެނޭ ކަމަށް އޭނާ ބުންޏެވެ.
ރަޝީދު އިތުރަށް ބުނީ ފަހަކަށް އައިސް ރާއްޖޭގައި ފެންނަ މަސްތުވާތަކެތީގެ ބާވަތްތައް ކުރިއާ އަޅާބަލާއިރު ތަފާތުވެފައިވާ ކަމަށެވެ. މިގޮތުން، މިހާރު ރާއްޖޭގައި 'ސިންތެޓިކް' މަސްތުވާތަކެތި، ނުވަތަ ގުދުރަތީ ގޮތުން އުފެދޭ މަސްތުވާތަކެތި އެއްކޮށްގެން އުފައްދާ މަސްތުވާތަކެތީގެ އާ، ނުރައްކާތެރި ބާވަތްތަކެއް ވަނީ ތައާރަފްވެފައި ކަމަށް އޭނާ ފާހަގަކުރިއެވެ. މިކަމުގެ ސަބަބުން ފަރުވާ ހޯދުމަށް އަންނަ ގިނަ ކުދިންނަކީ 'ސައިކޯސިސް'ގެ ތެރެއަށް ވެއްޓޭ ކުދިންކަން ވެސް އޭނާ ފާހަގަކުރިއެވެ.
