މި މަހާސިންތާ އިންތިޒާމު ކޮށްފައި ވަނީ މޯލްޑިވްސް މާކެޓިން އެންޑް ޕަބްލިކް ރިލޭޝަން ކޯޕަރޭޝަން (އެމްއެމްޕީއާރްސީ) އާއި ޓޫރިޒަމް މިނިސްޓްރީ ގުޅިގެންނެވެ.
މި މަހާސިންތާގައި 150 އަށް ވުރެ ގިނަ ބައިވެރިން ބައިވެރިވާ ކަމަށް އެމްއެމްޕީއާރްސީން ބުނެފައިވެ އެވެ. މީގެ ތެރޭގައި ރިސޯޓުތަކާއި ގެސްޓްހައުސް، ލިވަބޯޑު އަދި ލޯކަލް ޓޫރިޒަމްގައި މަސައްކަތްކުރާ ފަރާތްތަކާއި ޓްރެވަލް އެޖެންޓުން އަދި ފަތުރުވެރިކަމާ ބެހޭ ޖަމިއްޔާތަކާއި، ޓްރެވަލް މީޑިއާތައް ހިމެނެ އެވެ.
ޓޫރިޒަމް މިނިސްޓަރު އިބްރާހިމް ފައިސަލް އާއި އެމްއެމްޕީއާރްސީގެ މެނޭޖިން ޑިރެކްޓަރު ޝިއުރީ އިބްރާހިމް އަދި އެމްއެމްޕީއާރްސީގެ ޗެއާޕާސަން އަބްދުﷲ ގިޔާސް މި މަހާސިންތާގައި ބައިވެރިވެ ވަޑައިގަންނަވާ ކަމަށް އެމްއެމްޕީއާރްސީން މައުލޫމާތު ދީފައިވެއެވެ.
މި މަހާސިންތާގެ މަގުސަދަކީ ރާއްޖޭގެ ފަތުރުވެރިކަން އިތުރަށް ކުރިއެރުވުމަށް ކުރެވިދާނެ ކަންތައްތަކާ ބެހޭ ގޮތުން ދާއިރާގެ ފަރާތްތަކާ މަޝްވަރާކޮށް، އާ ހިޔާލުތަކާއި ވިސްނުންތައް ދެނެގަތުން ކަމަށް އެމްއެމްޕީއާރްސީން ބުނެފައިވެ އެވެ. މީގެ އިތުރުން ފަތުރުވެރިކަމަށް އާ ސެގްމަންޓްތައް ތައާރަފު ކުރުމަށް މަޝްވަރާ ކުރުމަށް ވެސް ވަނީ އެޖެންޑާ ކުރެވިފައެވެ.
