އެމްޑީޕީގެ އިކޮނޮމިކް ކޮމިޓީން ބޭއްވި ޕްރެސްކޮންފަރެންސްގައި އަމީރު ވިދާޅުވީ، ސަރުކާރާ ހަވާލުވުމުގެ ކުރިން ޓްރާންސިޝަން މަރުހަލާގައި މި ފައިސާ ލިބޭނެ ކަމުގެ ޔަގީންކަން ދިން ކަމަށެވެ.
އަމީރު ވިދާޅުވި ގޮތުގައި، މިދިޔަ އަހަރުގެ ސަޕްލިމެންޓަރީ ބަޖެޓަށް 200 މިލިއަން ޑޮލަރު އަދި މި އަހަރުގެ ބަޖެޓަށް 400 މިލިއަން ޑޮލަރު ހޯދާނެ ކަމަށް ސަރުކާރުގެ ޓްރާންސިޝަން ކޮމިޓީން ކުރިން ބުނެފައިވެއެވެ. ނަމަވެސް މިހާރު މި ފެންނަނީ މުޅި ދުނިޔޭގައި ސިޓީ ހިފައިގެން ހިނގައިގެން އެއްވެސް ގައުމަކުން ފައިނޭންސިން ނުހޯދުނު މަންޒަރު ކަމަށް އޭނާ ވިދާޅުވިއެވެ.
އަމީރު ވިދާޅުވީ، އިއުލާން ކޮށްގެން އަމިއްލަ ފަރާތަކުން ވެސް އެއްވެސް ފައިސާއެއް ނުލިބޭ ކަމަށެވެ.
ސަރުކާރުގެ ފައިނޭންސިން ޕްލޭން ފެއިލްވުމުން، ޓެކްސް ބޮޑުކޮށްގެން ހަރަދުތައް ހަމަޖައްސަން ސިޔާސަތުތައް ބަދަލުކުރަން ނިންމި ކަމަށް އަމީރު ފާހަގަކުރެއްވިއެވެ. ނަމަވެސް ހަރަދުތައް ކުޑަނުކޮށް ޓެކްސް ބޮޑުކުރުމާ އެމްޑީޕީން ދެކޮޅު ކަމަށާއި، އެގޮތަށް ކަންތައް ކުރިޔަސް އިގުތިސޯދަށް އަދި މާލީ ކަންކަން މެނޭޖުކުރުމަށް އެއްވެސް ފައިދާއެއް ނުކުރާނެ ކަމަށް އަމީރު ވިދާޅުވި އެވެ.
ވޯލްޑް ބޭންކުގެ މައުލޫމާތު ދައްކާގޮތުގައި މިއަހަރުގެ ފުރަތަމަ ކުއާޓަރގައި ރާއްޖޭގެ ޖުމްލަ ދަރަނި ހުރީ 8.2 ބިލިއަން ޑޮލަރުގައެވެ. މިއީ ޖީޑީޕީގެ 116 އިންސައްތަ އެވެ. މީގެ ގާތްގަނޑަކަށް ދެބައިކުޅައެއްބައި އަކީ ބޭރުގެ ދަރަނިއެވެ. މީގެ ތެރެއިން ބޮޑު ބައެއް ދައްކަންޖެހެނީ ސަރަޙައްދީ ވާދަވެރިން ކަމުގައިވާ ޗައިނާ އަދި އިންޑިއާއަށެވެ. ޗައިނާއަށް 1.37 ބިލިއަން ޑޮލަރު އަދި އިންޑިއާއަށް 124 މިލިއަން ޑޮލަރު ދައްކަންޖެހެއެވެ.
