މައުލޫމާތު ލިބިފައިވާ ގޮތުގައި ވީއޭއެމް އާއި އެ އެސޯސިއޭޝަނުގެ ހިންގާ ކޮމިޓީ މެންބަރުންނާ މެދު ހަގީގަތާ ހިލާފު ވާހަކަ ފަތުރާ ފަރާތްތައް ދެ އަހަރަށް ސަސްޕެންޑް ކުރުމަށް އެ އެސޯސިއޭޝަނުންވަނީ ނިންމާފައެވެ. މި ގޮތަށް ނިންމާފައިވަނީ އެސޯސިއޭޝަންގެ އެކްސްކޯގެ 13 ކްލަބުގެ އިއްތިފާގުން ކަމަށްވަނީ މައުލޫމާތު ލިބިފައެވެ.
ވޮލީ އެސޯސިއޭޝަނުން ނިންމާފައިވަނީ އެ އެސޯސިއޭޝަނާ، އެކްސްކޯ މެންބަރުންނަށް އަމާޒުކޮށް ހަގީގަތާ ހިލާފު އަދި ބޭ އަދަބީ، ނުވަތަ މުޖުތަމައު ބަލައިނުގަންނަ ބަހުރުވަ ބޭނުންކޮށް ވާހަކަތަކާއި އިލްޒާމްތައް އަޅުވައި، ފޮޓޯ، ސޯޝަލް މީޑިޔާގައި ދައުރުކުރާ ފަރާތްތަކުގެ މައްސަލަ ބަލައި އެފަރާތްތަކަށް ރާއްޖޭގައި ރާވާ ހިންގާ ވޮލީގެ އެއްވެސް ހަރަކާތެއްގައި މަދުވެގެން ދެ އަހަރު ދުވަހަށް ބައިވެރިވުން މަނާ ކުރުމަށެވެ.
މިކަމާ ސޯޝަލް މީޑިއާގައި ކުރީގެ ކުޅުންތެރިންނާއި ބައެއް ކޯޗުން އަދި އާއްމުން އަންނަނީ ފާޑު ކިޔަމުންނެވެ. މިއީ ދިވެހި ކުޅިވަރު އެސޯސިއޭޝަނަކުން ނިންމި މި ފަދަ ފުރަތަމަ ނިންމުމެވެ.
