މިނިސްޓަރު ފައިސަލް މިހެން ވިދާޅުވީ ރައްޔިތުން މަޖިލީހުގައި މިއަދު މެމްބަރަކު ކުރެއްވި ސުވާލަކަށް ޖަވާބު ދެއްވަމުންނެވެ.
ފައިސަލް ވިދާޅުވީ ފަތުރުވެރިކަން ތަރައްޤީކުރުމަށް ނަގާފައިވާ 58 ރަށެއް ނުހެދި އެބައޮތް ކަމަށެވެ. އޭގެތެރޭގައި 30 އަހަރުވެފައި ހުރި ރަށްތައް ހުރިކަން މިނިސްޓަރު ފައިސަލް ފާހަގަކުރެއްވިއެވެ.
މިނިސްޓަރު ވިދާޅުވީ ތަރައްގީކުރަން ދީފައިވާ ރަށްތަކުން މަސައްކަތް ކުރިޔަށް ނުދާ 22 ރަށެއްގެ އެއްބަސްވުން ބާތިލުކުރަން މަސައްކަތް ކުރަމުން އަންނަކަމަށެވެ. އަދި މިކަމުގައި ބަންޑާރަ ނައިބު އަހްމަދު އުޝާމުގެ ލަފާފުޅަކަށް އެދިވަޑައިގެންފައިވާ ކަމަށް މިނިސްޓަރު ފައިސަލް ވިދާޅުވިއެވެ.
ރިސޯޓް ތަރައްގީކުރަން ދޫކޮށްފައިވާ ރަށްތައް ނުނިމި ވާތީ އެ ފަރާތްތަކާއި މިނިސްޓްރީން ބައްދަލުކޮށްފައިވާކަން ފާހަގަކުރައްވަމުން މިނިސްޓާރު ފައިސަލް ވިދާޅުވީ ހުރިހާ ފަރާތެއްގެ ކަންބޮޑުވުމަކަށްވީ ފަންޑު ނުލިބުމުގެ މައްސަލަކަމަށެވެ.
މިނިސްޓަރު ވިދާޅުވީ ރާއްޖޭގައި ޑިވެލޮޕްމަންޓު ބޭންކު ތައާރަފުވުމުން ފަތުރުވެރިކަމަށް އިންވެސްޓު ކުރުމަށް ބޭނުންވާ ފަރާތްތަކަށް އިތުރު ފުރުސަތުތައް ލިބިގެންދާނެކަަމަށެވެ.
ފައިސަލް ވިދާޅުވީ ރިސޯޓު ހަދަން ރަށްތައް ނަގާފައިވާ ފަރާތްތަކުގެ ތެރެއިން ނުނިމި ހުރި ރަށްތައް ނަގާފައިވާ ފަރާތްތަކާއި އިންވެސްޓަރުންނާއި ގުޅުވައިދިނުމުގެ މަސައްކަތް މިނިސްޓްރީން ކުރަމުން އަންނަކަމަށެވެ. އަދި ބައެއް ރަށްތަކުގެ ޖޫރިމަނާ 100 މިލިއަން ރުފިޔާއަށް އަރާފައިވާކަން ފާހަގަކޮށް މިނިސްޓަރު ފައިސަލް ވިދާޅުވީ އެރަށްތައް މާކެޓަށް ނެރެން ބޭނުންނަމަ އެ ރަށްތަކަށް އަރާފައިހުރި ބޮޑެތި ޖޫރިމަނާއާއި އިންޓްރެސްޓުތަކަށް ލުއިތަކެއް ދޭންޖެހޭ ކަމަަށެވެ.
