ބޫޓާނުގައި ކުރިއަށްދާ ޓީޓުވެންޓީ ކުއަޑްރަންގިއުލާ ކްރިކެޓް މުބާރާތުގެ ފައިނަލުން ރާއްޖެ ފުރުސަތު ހޯދީ، ސެމީ ފައިނަލުގައި ބޫޓާން އަތުން ހަތް ވިކެޓުން މޮޅުވެގެންނެވެ. ސެމީގައި ރާއްޖެ ބޫޓާން އަތުން މޮޅުވިއިރު، މުބާރާތުގެ ފުރަތަމަ ބުރުގައި ބޫޓާނުން ރާއްޖެ ބަލިކުރިއެވެ.
ސެމީ ފައިނަލް މެޗުގެ ޓޮސް ދިމާވުމުން ބޫޓާނުން ނިންމީ ކުޅެން އަރާށެވެ. ބޫޓާނުން ކުޅެން އަރައި 20 އޯވަރު ހަމަވިއިރު، އެ ޓީމުން ވަނީ އަށް ކުޅުންތެރިން ނުބައިވެގެން 122 ލަނޑު ހަދައިފަ އެވެ.
ޖަވާބުގައި ރާއްޖޭން ކުޅެން އަރައި، ޓީމުގެ ކެޕްޓަން، ޔޫސުފް އަޒްޔާން ފަރުހަތު ވަނީ 52 ބޯޅައިން 51 ލަނޑު ހަދައިފަ އެވެ. މިއީ، އަޒްޔާން މި ފަހަރުގެ މުބާރާތުގައި ހެދި ދެ ވަނަ ހާފް ސެންޗަރީ އެވެ.
ފައިނަލުގައި ރާއްޖޭން ކުޅޭނީ ތައިލެންޑާއެވެ. ލީގު ބުރުގައި އެ ޓީމު އަތުން ބަލިވީ 44 ލަނޑުންނެވެ. ފައިނަލް ކުޅޭނީ މާދަމާއެވެ.
