މި ނިންމުން ނިންމީ ކުރިން ރޭވިފައިވާ ގޮތަށް މާގިރިފަޅަށް ބަދަލުކުރުމުގެ ބަދަލުގައެވެ.
ސަރުކާރުގެ އިސް އޮފިޝަލެއް ބުނީ މި ބަދަލު ގެނައީ މާގިރިފަޅު ހިއްކުމުގެ ކުރިން ހެދުނު އެންވަޔަރަންމަންޓަލް އިމްޕެކްޓް އެސެސްމަންޓް (އީއައިއޭ) ގެ ނަތީޖާއަށް ބަލައިގެން ކަމަށެވެ. އެ އެސެސްމަންޓުން ދައްކާ ގޮތުގައި މާގިރިފަޅަކީ ފުން ސަރަހައްދަކަށް ވުމާއެކު، އެތަން ހިއްކައިފިނަމަ އެ ސަރަހައްދުގެ ތިމާވެއްޓަށް ނޭދެވޭ އަސަރުތަކެއް ކުރާނެ ކަމަށް ފާހަގަކުރެވުނެވެ.
މި މަޝްރޫއު ތިލަފުއްޓަށް ބަދަލުކުރުމަށްޓަކައި އެޗްޑީސީ އާއި އެސްޓީއޯ އާ ދެމެދު މަޝްވަރާތައް ކުރިއަށްދާ ކަމަށް އެ އޮފިޝަލް ވިދާޅުވިއެވެ. މި މަޝްވަރާތަކުގެ މައިގަނޑު ބޭނުމަކީ ތިލަފުށީގައި ބިން ހަމަޖެއްސުމުގެ މަސައްކަތް ކުރިއަށް ގެންދިއުމެވެ.
ފުނަދޫ ހުސްކުރުމަކީ ރައީސް ޑރ. މުހައްމަދު މުއިއްޒުގެ ސަރުކާރުން ކުރިން ނިންމާފައިވާ ކަމެކެވެ. މި ނިންމުމުގެ ބޭނުމަކީ ވެލާނާ އިންޓަނޭޝަނަލް އެއާޕޯޓް ތަރައްގީކުރުމުގެ ތިންވަނަ ފިޔަވަހީގެ ދަށުން ފުނަދޫގައި ބައިނަލްއަގުވާމީ ފައިނޭންޝަލް ސެންޓަރެއް ހިމެނޭ ސްޕެޝަލް އިކޮނޮމިކް ޒޯނެއް ތަރައްގީކުރުމެވެ. މި މަޝްރޫއުގެ ދަށުން މާލެ، ފުނަދޫ، ހުޅުލެ އަދި ހުޅުމާލެ ގުޅުވައިދޭ ބްރިޖުތަކެއް އެޅުމަށްވެސް ވަނީ ރޭވިފައެވެ.
