މަޖިލީހުގެ ޖަލްސާއެއްގައި ވާހަކަފުޅު ދައްކަވަމުން މިނިސްޓަރު ވިދާޅުވީ، ސިޔާސީ މުވައްޒަފުންގެ މުސާރައަށް އަހަރަކު ގާތްގަނޑަކަށް 120 މިލިއަން ރުފިޔާ ހަރަދުވާ ކަމަށެވެ.
ޒަމީރު ވިދާޅުވި ގޮތުގައި، މިއީ މަހަކު 10 މިލިއަން ރުފިޔާ އެވެ. އަދި މިހާރު ސިޔާސީ މުވައްޒަފުންގެ އަދަދު 1،200 އަށް ވުރެ މަތީގައި އުޅޭ ކަމަށް އޭނާ ފާހަގަކުރެއްވި އެވެ. މިނިސްޓަރު އިތުރަށް ވިދާޅުވީ، ސިޔާސީ މުވައްޒަފުންގެ މުސާރައަކީ ސަރުކާރުގެ މުޅި މުސާރަ އާއި އިނާޔަތްތަކަށް ހޭދަކުރާ މިންގަނޑުގެ ހަތަރު ޕަސަންޓަށް ވުރެ ދަށް އަދަދެއް ކަމަށެވެ.
ދައުލަތުގެ ފިސްކަލް ހަރަދުގެ ދެމެހެއްޓެނިވި ކަން ކަށަވަރު ކުރުމަށް މުހިއްމު ފިޔަވަޅުތަކެއް އަޅަމުންދާ ކަމަށް ޒަމީރު ވިދާޅުވި އެވެ. މީގެ ތެރޭގައި ސަރުކާރު ހިއްސާވާ ކުންފުނިތަކުގެ ހިންގުން ހަރުދަނާ ކުރުމާއި، ކުންފުނިތައް ފައިދާވާ ކުންފުނިތަކަށް ހެދުމާއި، ސަރުކާރަށް ބަރޯސާވާ މިންވަރު ކުޑަކުރުން ހިމެނެ އެވެ.
މީގެ އިތުރުން، ދަތުރުފަތުރާއި ހަފްލާތައް ބޭއްވުން ފަދަ ކަންކަމަށް ކުރާ ހަރަދުތައް ހިފެހެއްޓުމަށް ގިނަ ކޮންޓްރޯލްތަކެއް ގެނެސްފައިވާ ކަމަށާއި، މިކަމުގެ ނަތީޖާ ފެންނަމުންދާ ކަމަށް ވެސް ފިނޭންސް މިނިސްޓަރު ވިދާޅުވި އެވެ. މި ހުރިހާ ފިޔަވަޅުތަކަކީ ވެސް ދައުލަތުގެ މާލީ ހާލަތު ރަނގަޅު ކުރުމަށް އަޅަމުންދާ ފިޔަވަޅުތަކެއް ކަމަށް އޭނާ ފާހަގަކުރެއްވި އެވެ.
