ފިނޭންސް މިނިސްޓަރު މިއަދު މަޖިލީހަށް ހުށަހެޅި ސަޕްލިމެންޓަރީ ބަޖެޓަކީ 5.1 ބިލިއަން ރުފިޔާގެ ބަޖެޓެކެވެ. މި ބަޖެޓާ އެކު މި އަހަރުގެ ޖުމްލަ ބަޖެޓު 55 ބިލިއަން ރުފިޔާއަށް އަރާނެ ކަމަށް މާލީ މިނިސްޓްރީން ބުނެފައިވެ އެވެ.
މި ސަޕްލިމެންޓަރީ ބަޖެޓުގައި ޖުމްލަ އާމްދަނީއާއި ހިލޭ އެހީއަށް އިތުރަށް 640 މިލިއަން ރުފިޔާ ލިބޭނެ ކަމަށް އަންދާޒާކޮށްފައިވެ އެވެ. އޭގެ ތެރޭގައި ޓެކުހުގެ ގޮތުގައި ލިބޭ އާމްދަނީން އިތުރު 61 މިލިއަނާއި އެހެނިހެން އާމްދަނީގެ ގޮތުގައި 379 މިލިއަނާއި ހިލޭ އެހީގެ ގޮތުގައި 199 މިލިއަން ރުފިޔާ ހިމެނެ އެވެ.
މި ބަޖެޓާ އެކު މި އަހަރުގެ ބަޖެޓު ޑެފިސިޓު 18 ބިލިއަން ރުފިޔާއަށް އަރާނެ ކަމަށް މާލީ މިނިސްޓްރީން ލަފާކޮށްފައިވެ އެވެ. އެއީ، އުފެއްދުންތެރިކަމުގެ ނިސްބަތުން 16 ޕަސަންޓެވެ. އަދި އަހަރު ނިމޭއިރު ދަރަނި ހުންނާނީ އުފެއްދުންތެރިކަމުގެ ނިސްބަތުން 118 ޕަސަންޓުގައި ކަމަށް ވަނީ ލަފާކޮށްފަ އެވެ.
