އިޓަލީގެ ވެރިރަށް ރޯމްގައި މިމަހުގެ 21 އިން 25އަށް ކުރިއަށް ގެންދާ ކޮމިޓީ އޮން ވޯލްޑް ފުޑް ސެކިޔުރިޓީ ބައްދަލުވުމުގެ ރިޕޯޓުގައި ހިމަނާ މުހިންމު ކަންކަމާއި ގުޅޭގޮތުން އެކި ގައުމުތަކުން ގެންދަނީ އެގައުމުތަކުން ދެކޭ ގޮތް ކޮމިޓީގައި ހާމަ ކުރައްވަމުންނެވެ.
މިރިޕޯޓުގައި ހިމެނުމަށް ހުށަހެޅި ނުކުތާތަކުގެ ތެރެއިން، ގައުމުތަކުގެ މެދުގައި ދިގުކޮށް ބަހުސް ކުރެވިގެން ދިޔަ އެއް ނުކުތާއަކަށް ވެގެންދިޔައީ ދުނިޔޭގައި ހަމަނުޖެހުންތަކާއި ހަނގުރާމަތައް ހިންގަމުންދާ ސަރަހައްދުތަކުގައި ފެނާ ކާބޯތަކެއްޗަކީ ހަނގުރާމައިގެ ހަތިޔާރުގެ ގޮތުގައި ބޭނުންކުރުން ހުއްޓާލުމަށާއި، ހާއްސަގޮތެއްގައި ފަލަސްތީނާއި ގާޒާގެ ރައްޔިތުންނަށް ބޭނުންވާ ކާނާއާއި، ފެނާއި، ބޭސްފަރުވާފަދަ އަސާސީ ހިދްމަތްތައް ދާއިމީގޮތެއްގައި ފޯރުކޮށްދިނުމަށް އދގެ ކާނާއާއި ދަނޑުވެރިކަމާބެހޭ ޖަމްއިއްޔާ (އެފްއޯއޭ) އާއި ކަމާގުޅުންހުރި އެހެނިހެން ބައިނަލްއަގްވާމީ އިދާރާތަކުން މަސައްކަތް ކުރުމަށް ގޮވާލާ ކުވައިތުން ހުށައެޅި ނުކުތާއެވެ.
ކުވައިތުގެ މިހުށަހެޅުމަށް ތާއީދުކުރައްވައި މިނިސްޓާ ޑރ. އައިޝަތު ރަމީލާ ވަނީ މިކޮމިޓީގައި ވާހަކަފުޅު ދައްކަވާފައެވެ.
މިކޮމިޓީގައި ހިމެނޭ ގިނަ ގައުމުތަކުން ވަނީ ކުވައިތުގެ ހުށަހެޅުމަށް ތާއީދުކޮށްފައެވެ. މިހުށަހެޅުމަށް ސީދާގޮތުން އެއްވެސް ގައުމަކުން ދެކޮޅު ހަދާފައިނުވުމާއެކު، ކޮމިޓީގެ ޗެއާ ޕާސަން ވަނީ މިހުށަހެޅުން ކޮމިޓީގެ ރިޕޯޓުގައި ހިމެނުމަށް ނިންމަވާފައެވެ.
ކޮމިޓީ އޮން ވޯލްޑް ފުޑް ސެކިޔުރިޓީގެ 52 ވަނަ ބައްދަލުވުމުގެ މައިގަނޑު އެއް މަގްސަދަކީ ދުނިޔޭގެ ކާނާގެ ޔަގީންކަން ކަށަވަރު ކުރުމަށްޓަކައި ސަސްޓެއިނަބްލް، އިންކްލޫސިވް، ރެސިލިއެންޓް ފުޑް ސިސްޓަމްއެއް އުފެއްދުމަށް ބައިނަލްއަގްވާމީ މުޖުތަމައުން ކުރެވެން ހުރި ކަންކަން ދެނެގަތުމެވެ.
