މިދިޔަ ބުދަ ދުވަހު ރައީސް ޑރ. މުހައްމަދު މުއިއްޒު އިއުލާން ކުރައްވާފައި ވަނީ ސިޔާސީ މުވައްޒަފުންނާއި ދައުލަތުގެ ތިން ބާރުގެ އިސް ބޭފުޅުންނާއި މިނިވަން މުއައްސަސާތަކުގެ ވެރިންނާއި މަޖިލީހުގެ މެމްބަރުންނާއި ސަރުކާރު ކުންފުނިތަކުގެ އިސްވެރިންގެ މުސާރައިން 10 ޕަސެންޓް ދެ އަހަރު ދުވަހުގެ މުއްދަތަށް އުނިކުރާށެވެ.
މީގެ އިތުރުން ރައީސް ވަނީ ކުންފުނިތަކުގެ ވެރީންނަށް އެންމެ ބޮޑުކޮށް ދެވޭނީ 90،000 ރުފިޔާ ކަމަށް ކަނޑައެޅުއްވާފަ އެވެ. މިވަގުތު ބައެއް ކުންފުނތަކުގެ މުސާރަ އޮނިގަނޑުގައިވާ ގޮތުން 100،000 އަށްވުރެ ބޮޑު މުސާރައެއް ލިބެއެވެ.
މިނިވަން މުއައްސަސާތަކުގެ އިސްވެރިންގެ މުސާރައިންނާއި ޝަރުރީ ދާއިރާގެ އިސްވެރިން އަދި ރައްޔިތުންގެ މަޖިލީހުގެ މެމްބަރުންގެ މުސާރައިން ވެސް 10 ޕަސަންޓު ކުޑަކުރުމަށް ކަމާބެހޭ ފަރާތްތަކަށް ރައީސް މުއިއްޒު ވަނީ ހުށަހަޅާފަ އެވެ.
ރައީސް ވިދާޅުވީ 12،000 އަށްވުރެ ކުޑަ މުސާރައެއް ލިބޭ މުވައްޒަފުންގެ މުސާރައަކަށް ބަދަލެއް ނާންނާނެ ކަމަށެވެ.
ރައީސްގެ އެ ނިންމެވުންތަކަށް އިޝާރާތް ކުރައްވައި ފަލާހް އެކްސްގައި ކުރެއްވި ޕޯސްޓެއްގައި ރޭ ވިދާޅުވީ ހަރަދުތައް ކުޑަކުރުމަށް އެ މަނިކުފާނު އަޅުއްވަމުން ގެންދަވާ ފިޔަވަޅުތަކަށް އެއްބާރުލުހުން ދެއްވުމުގެ ގޮތުން މަޖިލީހުގެ މުސާރައިން އަންނަ ނޮވެމްބަރު މަހުގެ 1 އިން ފެށިގެން އެއް އަހަރުގެ މުއްދަތަކަށް 10 ޕަސެންޓް އުނިކުރަން ނިންމަވާފައިވާ ކަމަށެވެ.
މަޖިލިސް މެންބަރުންގެ މުސާރަތައް ކަނޑައަޅަނީ މެންބަރުން އަމިއްލަފުޅަށް ކަމަށްވާއިރު، މެންބަރުންގެ މުސާރައަކީ މިހާރު ކޮމިޓީ އެލަވަންސާ އެކު 82،500 ރުފިޔާއެވެ.
ފާހަގަކޮށްލެވޭ ގޮތުގައި ރައްޔިތުންގެ މަޖިލީހުގެ ރައީސްކަމުގެ މަގާމުގެ މުސާރައިގެ 50 ޕަސެންޓު ނުނަގަން ނިންމަވައިފައިވާކަމަށް މަޖިލިސް ރައީސް އަބްދުއްރަހީމް އަބްދުﷲ ވެސް ވަނީ ނިންމަވާފަ އެވެ.
