އެ ކޯޕަރޭޝަނުން ނީލަމުގައި ވިއްކާލަނީ ހުޅުމާލެ ގޯތި ނަންބަރު 10718 "އޯކިޑް ހިޔާ" އިމާރާތާއި ގޯއްޗެވެ. އެ ގެއަކީ މއ. ޗަންޕާމާގެ، ހަދީޖާ އަބްދުއްސައްތާރާއި ދަފްތަރު ނަންބަރު 3290 ޖަމީލު އުސްމާނުގެ ނަމުގައި ރަޖިސްޓްރީ ކޮށްފައިވާ ގެއެކެވެ.
އެގެއަކީ އެޗްޑީއެފްސީ ލޯނަށް ރަހުނު ކޮށްފައިވާގެއެވެ.
އެޗްޑީއެފްސީ ބުނީ ވިއްކާލަން އިއުލާންކޮށްފައިވާ ގޭގައި 1،951 އަކަފޫޓު ހުންނަކަމަށާއި ގެ ވިއްކާލަން ފެށޭ އަގަކީ 25.7 މިލިއަން ރުފިޔާކަމަށެވެ.
އެ ގެއަށް އަގު ހުސައެޅުމުގެ ފުރުސަތު ހުޅުވާލާފައިވާއިރު އެ މުއްދަތު ހަމަވާނީ އަންނަ މަހުގެ 14 ވަނަ ދުވަހަށްކަމަށް އެޗްޑީއެފްސީ ބުނެއެވެ. އަދި ހުށަހަޅާ އަގުތަކުގެ ސިޓީ ހުޅުވުން އެދުވަހު އޮންނާނެ ކަމަށް އެޗްޑީއެފްސީ އިން ބުނެއެވެ.
އެ ކޯޕަރޭޝަނުން ބުނީ ރަސްމީ ބަންދު ދުވަސްތައް ނުހިމެނޭހެން ޖެހިޖެހިގެން ތިން ދުވަހު އެއް އަގެއްގައި އޮވެއްޖެނަމަ ނީލަން ނިންމާލާނެ ކަމަށެވެ.
އެންމެ މަތީ އަގު ހުށަހެޅި ފަރާތުން ފައިސާ ދައްކަންޖެހޭނީ ނީލަން ނިންމާލާ ދުވަހުން ފެށިގެން 10 ދުވަހުގެ ތެރޭގައި ކަމަށާއި އެ މުއްދަތުގައި ފައިސާ ނުދައްކާނަމަ ދެވަނައަށް އެންމެ މަތީ އަގު ހުށަހެޅި ފަރާތަކަށް ފުރުސަތު ދޭނެ ކަމަށް އެޗްޑީއެފްސީ ބުނެއެވެ. އެގޮތަށް އޮތް ނަމަވެސް އެ ކޯޕަރޭޝަނުން ބޭނުންވާނަމަ އަލުން ނީލަމަށް ހުޅުވާލެވިދާނެކަމަށްވެސް އެޗްޑީއެފްސީ ބުނެއެވެ.
މި ގެ ނީލަމުގައި ވިއްކާލަން އިއުލާން ކުރި ނަމަވެސް ގޭގެ ވެރިފަރާތުން އެޗްޑީއެފްސީއަށް ދައްކަންޖެހޭ ފައިސާ ދައްކަން ބޭނުންވާނަމަ އެ ފަރާތަށް އިސްކަންދޭނެ ކަމަށްވެސް ވަނީ ބުނެފައެވެ.
