ސުޕްރީމް ކޯޓުގެ ފަނޑިޔާރުން ބުނީ ސީބީއައި އިން ހުށަހެޅި މައްސަލައަކީ ހަމައެކަނި މައްސަލައިގައި ހިމެނޭ ފަރާތްތަކަކީ މަހްޝޫރު ބައެއް ކަމަށްވާތީ ހުށަހަޅާފައިވާ މައްސަލައެއް ކަމަށެވެ. އަދި މިއީ "ބޭކާރު" މައްސަލައެއް ކަމަށް ފަނޑިޔާރުން ވަނީ ފާހަގަކޮށްފަ އެވެ.
ސުޝާންތް ސިންގް މަރުވުމާ ގުޅިގެން 2020 ވަނަ އަހަރު ރިއާ އާއި އޭނާގެ އާއިލާގެ މެންބަރުންނަށް އިންޑިއާއިން ބޭރަށް ދިއުން މަނާކުރާ ލުކްއައުޓް ސާކިއުލާއެއް ނެރުނެވެ. އެހެންނަމަވެސް މިއަހަރުގެ ކުރީކޮޅު ބޮމްބޭ ހައި ކޯޓުން ވަނީ އެ ސަރކިއުލާ ބާތިލުކޮށްފަ އެވެ.
ސީބީއައި އިން މިހާތަނަށް ސުޝާންތް ސިންގްގެ މަރުގެ މައްސަލައިގައި ދައުވާ ކުރާނެ ކަރުދާހެއް ހުށަހަޅާފައެއް ނުވެ އެވެ. ސުޝާންތް މަރުވުމާ ގުޅިގެން ރިއާ އާއި އޭނާގެ އާއިލާގެ މެންބަރުންނާ ދެކޮޅަށް މަނީ ލޯންޑަރިންގެ ތުހުމަތުތަކެއް ކުރެވުނެވެ. އަދި މަސްތުވާތަކެއްޗާ ގުޅުންހުރި މައްސަލައެއްގައި ރިއާ ހައްޔަރުކޮށް ޖަލުގައި ބަންދުކުރި އެވެ. ނަމަވެސް ފަހުން އޭނާއަށް ވަނީ ބަންދުން ދޫކޮށްލައިފަ އެވެ.
