ހައުސިން މިނިސްޓްރީން ބުނީ "ގުޅީފަޅުގެ ލޭންޑް ޔޫސް ޕްލޭން"ގެ ދަށުން އައިސްފައިވާ ބަދަލާގުޅިގެން، ކުރިން ބިންވެރިޔާ ސްކީމުގެ ދަށުން ގުޅީފަޅުން ގޯތި ލިބިފައިވާ ފަރާތްތަކުގެ ގޯތީގެ ލޮކޭޝަނަށް ވަނީ ބަދަލު އައިސްފައިވާކަމަށެވެ.
މި ބަދަލާއި ގުޅިގެން ގޯތިތަކުގެ ވެރިފަރާތްތަކާއި މިހާތަނަށް ގުޅީފަޅުން ގޯތި ހަވާލުކޮށްފައިވާ ފަރާތްތަކުގެ އިތުރުން ގިރާވަރު ފަޅުން ލިބިފައިވާ ގޯތިތައް ގުޅީފަޅަށް ބަދަލުވެފައިވާ ފަރާތްތަކުގެ މެދުގައި ގުރުއަތު ނެގުން އޮންނާނެކަަމަޑށް ހައުސިން މިނިސްޓްރީން ބުނެއެވެ. އަދި މި ގުރުއަތު ނެގުން އޮންނާނީ މިމަހުގެ 29ގައި އަންގާރަ ދުވަހުގެ ދަރުބާރުގެ ރަންނަބަނޑޭރި މާލަމްގައި ކަމަށްވެސް ހައުސިން މިނިސްޓްރީން ބުނެއެވެ. އަދި ގުރުނަގަން ފަށާނީ ހެނދުނު ނުވައެއް ޖަހާއިރުކަމަށްވެސް މިނިސްޓްރީން ބުނެއެވެ.
ގުޅީފަޅުން ގޯތިލިބޭ ފަރާތްތަކުގެ ލިސްޓެއް ގެޒެޓްގައި ހައުސިން މިނިސްޓްރީން ވަނީ އާއްމުކޮށްފައެވެ.
ގޯތީގެ ސައިޒާއި އަދަދުތައް
- 1250 އަކަފޫޓުގެ 669 ގޯތި
- 1650 އަކަފޫޓުގެ 1234 ގޯތި
- 2050 އަކަފޫޓުގެ 916 ގޯތި
- 2450 އަކަފޫޓުގެ 473 ގޯތި
- 2850 އަކަފޫޓުގެ 158 ގޯތި
- 3250 އަކަފޫޓުގެ 49 ގޯތި
- 3650 އަކަފޫޓުގެ 21 ގޯތި
ގުޅީފަޅުގެ ބިން ލިބޭ ފަރާތްތަކުގެ ގުރުނެގުމުގެ ކަންކަން ކުރިއަށް ގެންދާނީ މި މިނިސްޓްރީން އެކުލަވާލާފައިވާ ލިސްޓުގައިވާ ތަރުތީބުން، އެކަމަށް ކަނޑައަޅާފައިވާ މި މިނސްޓްރީގެ މުވައްޒަފުންކަމަށްވެސް އެ މިނިސްޓްރީން ބުނެއެވެ.
ބިން ލިބޭ ފަރާތެއްގެ ބަދަލުގައި އެހެން ފަރާތަކުން ހާޒިރުރުވާން ބޭނުންނަމަ، ބިން ލިބޭ ފަރާތުގެ އިއުތިރާޒެއްނެތް ކަމުގެ ލިޔުމަކާ އައި.ޑީ.ކާޑްގެ ކޮޕީ އަކާއެކު ގުރުއަތުގައި ބައިވެރިވެވޭނެކަަމަށް ހައުސިން މިނިސްޓްރީން ބުނެއެވެ. ގުރުނެގުމުގެ އިވެންޓް ކުރިއަށްދާވަގުތު މީޑިއާއިން ލައިވް ކުރާނެކަަމަށްވެސް މިނިސްޓްރީން ބުނެއެވެ.
ގޯތިލިބޭ ފަރާތްތަކުގެ ގުރުނަގާ ނިމުމުން، ގޯތިތަކުގެ ރަޖިސްޓްރީ އާއި ބިން ލިބޭ ފަރާތްތަކާއެކުވާ އެއްބަސްވުން ތަކާއިގުޅޭ މަޢުލޫމާތު ފަހުން ހިއްސާކުރާނެކަަމަށްވެސް މިނިސްޓްރީން ބުނެއެވެ.
