އޮޑިޓާ ޖެނެރަލްގެ އޮފީހުން މިއަދު ނެރުނު ހާއްސަ އޮޑިޓް ރިޕޯޓުގައި ބުނެފައިވަނީ، ދީބާޖާއަށް އެންމެ ގިނަވެގެން ލިބޭނެ މާލީ ގެއްލުމަކީ 48 މިލިއަން ރުފިޔާ ކަމަށެވެ. އަދި ރ. ކުޑަކުރަތު ރިސޯޓް ސަބްލީސް ކޮށްގެން 65.5 މިލިއަން ރުފިޔާ ލިބިފައިވާތީ، އެ ކުންފުންޏަށް ވަނީ ފައިދާވެފައި ކަމަށެވެ.
އޮޑިޓް އޮފީހުން ބުނީ ދީބާޖާއަށް ބަދަލު ދިނުމަށް ނިންމީ އެ ކުންފުނިން ކޮށްފައިވާ ހަރަދުތަކާއި ވިޔަފާރީގެ މާލީ ހިސާބުތަކަށް ބެލުމެއް ނެތި ކަމަށެވެ. އަދި ދީބާޖާއަށް މިހާރު ދީފައިވާ 12.8 މިލިއަން ރުފިޔާ އަނބުރާ ހޯދުމަށާއި، އިތުރަށް ދޭން ހަމަޖެހިފައިވާ 51.2 މިލިއަން ރުފިޔާ ނުދިނުމަށް އަންގައިފި އެވެ.
އޮޑިޓް އޮފީހުން އަންގާފައިވަނީ މި މައްސަލައިގައި ދީބާޖާއަށް ދޭން ނުޖެހޭ ފައިސާ ދިނުމުގައި ޒިންމާވާ ފަރާތްތަކާމެދު ތަހުގީގު ކުރުމަށް ވެސް މެއެވެ. ދީބާޖާއާ އެކު ސެޓްލްމަންޓް އެއްބަސްވުމުގައި ސޮއިކުރީ 13 އޯގަސްޓް 2023 ގައި، ކުރީ ސަރުކާރުގެ އިކޮނޮމިކް ކައުންސިލުން ފާސްކުރުމަށް ފަހު އެވެ.
