މި ހިދުމަތް ފެށުމަށް ބޭއްވި ރަސްމިއްޔާތުގައި ހެލްތު މިނިސްޓަރު އަބްދުﷲ ނާޒިމް އިބްރާހިމް ވިދާޅުވީ ރައީސް މުއިއްޒުގެ ސަރުކާރުން ވަނީ ސިއްހީ ނިޒާމުގެ އާ ބާބެއް ފައްޓަވާފައި ކަމަށެވެ. އަދި މާލޭ ސަރަހައްދުގެ ހުރިހާ ހޮސްޕިޓަލްތަކެއް އެއް ނިޒާމެއްގެ ދަށުން ހިންގުމަށް ރައީސް ނިންމެވި ނިންމެވުމަކީ އެކަމުގެ ހެއްކެއް ކަމަށް ވެސް މިނިސްޓަރު ވިދާޅުވި އެވެ.
ވިލިމާލެ ހޮސްޕިޓަލުގައި މިހާރު ދެމުންދާ ހިދުމަތްތައް އާ ތަނަކަށް ބަދަލުކުރުމަށް ވަނީ ނިންމާފައެވެ. އެއީ އެ ސަރަހައްދުގައި 100 އެނދުގެ އާ ހޮސްޕިޓަލެއް އެޅުމަށް ހަމަޖެހިފައިވާތީ އެވެ. ހެލްތު މިނިސްޓަރު ބުނީ އާ ހޮސްޕިޓަލުގެ މަސައްކަތް ވަރަށް އަވަހަށް ފެށޭނެ ކަމަށެވެ.
ހެލްތު މިނިސްޓަރު އިތުރަށް ވިދާޅުވީ ރާއްޖެ ފަދަ ކުޑަ މުޖުތަމައެއްގައި ސިއްހީ ހިދުމަތް އެންމެ ފުރިހަމަ ގޮތުގައި ދެވޭނީ އެއް ނިޒާމެއްގެ ދަށުން ގުޅިގެން މަސައްކަތް ކުރެވިގެން ކަމަށެވެ. އަދި އެކަމަށް ހަރުދަނާ މެނޭޖްމަންޓް ހައްލެއް ބޭނުންވާ ކަމަށް ވެސް އެ މިނިސްޓަރު ވިދާޅުވި އެވެ.
