ފުލުހުން ބުނީ ގައްދޫ ބޭރުގައި އަޅާފައި އޮތް ސަފާރީއެއް ބަލައި ފާސްކުރުމުން ފެނުނީ 1،224 ބަނގުރާ ދަޅާއި 124 ބަނގުރާ ފުޅި ކަމަށެވެ. އެ ސަފާރީ ބަލައި ފާސްކޮށްފައި ވަނީ ކޯޓު އަމުރެއްގެ ދަށުން ކަމަށާއި، އެ އުޅަނދުގައި ގަވައިދާ ހިލާފަށް ބަނގުރާ ގެންގުޅެ ވިޔަފާރި ކުރާކަމުގެ މައުލޫމާތު ލިބުމުން ކަމަށް ފުލުހުން ބުންޏެވެ.
މި މައްސަލައާ ގުޅިގެން ދެ މީހަކު ފުލުހުންގެ ބެލުމުގެ ދަށަށް ގެންގޮސް ސުވާލުކުރުމަށްފަހު ދޫކޮށްލާފައިވާ ކަމަށް ފުލުހުން ބުންޏެވެ. ނަމަވެސް އެ މީހުން ދޫކޮށްލި ސަބަބެއް ފުލުހުން ހާމައެއް ނުކުރެ އެވެ.
ފުލުހުންގެ ތަފާސް ހިސާބު ދައްކާގޮތުން މިދިޔަ އަހަރުގެ ނޮވެމްބަރުން ފެށިގެން މި އަހަރުގެ އޮކްޓޯބަރު 20 އާ ހަމައަށް 8،300 އަށްވުރެ ގިނަ ބަނގުރާ ފުޅި އާއި ދަޅު ވަނީ އަތުލައިގެންފަ އެވެ. އަދި މި އަހަރުގެ ސެޕްޓެމްބަރާ ހަމައަށް މަސްތުވާތަކެއްޗާ ގުޅޭ 1،351 މައްސަލައެއް ފުލުހުންނަށް ހުށަހަޅާފައިވާ ކަމަށް ފުލުހުންގެ ތަފާސް ހިސާބުތަކުން ދައްކަ އެވެ.
