މިނިސްޓަރު މިހެންވިދާޅުވީ ރާއްޖޭގެ ގައުމީ ޔުނިވަރސިޓީގެ ދަރިވަރުންގެ، ދަރިވަރުންގެ ޔުނިއަނުން އިންތިޒާމްކޮށްގެން ބާއްވާ ފުޓްސަލް ފިއެސްޓާ ޝަރަފްވެރިކޮށްދެއްވާ ދެއްކެވި ވާހަކަފުޅުގައެވެ.
ކިޔަވާ ކުދިބަޔަކަށް ކުޅިވަރަކީ މުހިންމު ކަމެއްކަމަށް ފާހަގަކޮށް މިނިސްޓަރު ވިދާޅުވީ ކިޔެވުމާއި އެކުއެކީގައިހެން ކުޅިވަރު ކުޅުމަކީ އުގެނުމަށް ކުދިންނަށް ލިބޭނެ ވަރަށްބޮޑު އެހީއެއްކަމަށެވެ.
އެގޮތުން ކުޅިވަރުގެ ތެރެއިން ކުދިނަށް ޖިސްމާނީ އަދި ނަފްސާނީ ދުޅަހެޔޮކަމަށް މަގުފަހިކުރުވާ، ދިރިއުޅުމުގެ މައިދާނަށް ބޭނުންވާ ބައެއް ހުނަރުތައްވެސް ދަސްވެގެންދާނެކަމަށް މިނިސްޓަރު ވިދާޅުވިއެވެ.
މިނިސްޓަރުގެ ވާހަކަފުޅުގައި އިތުރަށް ވިދާޅުވީ މި ފަދަ ބޮޑު މުބާރާތެއް ދެ ޖިންސަށް ހަމަހަމަކަމާއި އެކު ހުޅުވާލައިގެން ކުރިޔަށް ގެންދިއުމަކީ ލިބޭ ވަރަށްބޮޑު އުފަލަކާއި ހިތްހަމަޖެހުމެއްކަމަށާއި، އުންމީދަކީ އެ މުބާރާތުން އެކުދިންނަށް އެކި ހުނަރުތައް ދަސްވެ، ގުޅުންބަދަހިވެގެން ދިއުންކަމަށެވެ.
މި މުބާރާތުގައި ޔުނިވަރސިޓީތަކާއި ކޮލެޖްތަކުން މިއަހަރު 30 ޓީމު ވަނީ ބައިވެރިވެފައެވެ. އެއީ އަންހެން ޑިވިޝަންގެ 12 ޓީމާއި ފިރިހެން ޑިވިޝަންގެ 18 ޓީމެވެ. އަދި މުބާރާތް ހިނގަމުންދާނީ 24 އޮކްޓޫބަރުން 10 ނޮވެންބަރުގެ ނިޔަލަށެވެ.
މަތީ ތައުލީމު ދޭ މުއައްސަސާތަކުގެ މުވައްޒަފުންނާ ތައުލީމު ހާސިލުކުރަމުންދާ ދަރިވަރުންނާއި އިދާރީ މުވައްޒަފުންގެމެދުގައި އިޖްތިމާއީ ރޫހާއި ގުޅުން ގާއިމުކޮށް އާލާކުރުމަށް ސިލްސިލާގޮތެއްގައި ބާއްވާ މި މުބާރާތަށް ކޮންމެއަހަރުވެސް އާންމުންގެ ސަމާލުކަން ވަރަށް ބޮޑުކަން ފާހަގަކުރެވެއެވެ.
