ބޫޓާން ޓީޓުވެންޓީ އިންޓަނޭޝަނަލް ކުއަޑްރަންގިއުލާ ސީރީސްގެ ރިހި މެޑަލް ދިވެހި ޓީމަށް ލިބުނީ، ފައިނަލް މެޗު މޫސުން ގޯސްވެގެން ނުކުޅެ ކެންސަލްކޮށްގެނެވެ. މުބާރާތުގެ ޗެމްޕިއަން ޓީމަކަށް ހޮވުނީ، ކުރީ މެޗުތަކުގެ ނަތީޖާގެ އަލީގައި ތައިލެންޑެވެ.
ބޫޓާންގެ ފުރަތަމަ ކްރިކެޓް ދަނޑު ހުޅުވުމުގެ ގޮތުން ބޭއްވި މި މުބާރާތުގައި އެ ގައުމުގެ އިތުރުން ދެން ވާދަކުރީ ރާއްޖެ އާއި، އިންޑޮނޭޝިއާ އަދި ތައިލެންޑެވެ. ރާއްޖެ ފައިނަލަށް ދަތުރުކޮށްފައިވަނީ ސެމީ ފައިނަލުގައި ބޫޓާން ހަތް ވިކެޓުން ބަލިކޮށްގެންނެވެ. މި މެޗުގައި ބޫޓާން އަތުން ރާއްޖެ މޮޅުވިއިރު، ލީގު ބުރުގައި ރާއްޖެ ވަނީ ބޫޓާން އަތުން ހަތަރު ވިކެޓުން ބަލިވެފައެވެ.
މުބާރާތުގެ ދެވަނަ މަގާމާއެކު އެނބުރި ރާއްޖެ އައުމުން މަރުހަބާ ވިދާޅުވީ ކޮމިޝަނަރ އޮފް ސްޕޯޓްސް މުޙައްމަދު ޠަލާލް އާއި ކުޅިވަރާ ބެހޭ ވުޒާރާގެ ބައެއް އިސްވެރިންނެވެ. އަދި ކްރިކެޓު ބޯޑުގެ އިސްވެރިންވެސް ބައިވެރިވެވަޑައިގެންނެވި އެވެ.
