ޓެކްސް އެޕީލް ޓްރައިބިއުނަލްގެ ހަތަރު މެންބަރަކު މަގާމުން ވަކިކޮށްފައިވާތީ އެ މަގާމްތަކަށް ރައްޔިތުން މަޖިލީހުގެ ލަފައާއެކު ރައީސް ޑރ. މުއިއްޒު އާ ހަތަރު ބޭފުޅުން އައްޔަން ކުރެއްވީ މިދިޔަ ހަފްތާގަ އެވެ. ރައީސް އައްޔަން ކުރެއްވި ބޭފުޅުންގެ ތެރޭގައި ސުޕްރީމް ކޯޓުގެ ކުރީގެ ފަނޑިޔާރު އަބްދުލްޣަނީ މުހައްމަދުވެސް ހިމެނިވަޑައިގަންނަވަ އެވެ.
ޓެކްސް އެޕީލް ޓްރައިބިއުނަލުން އާދިއްތަ ދުވަހުވަނީ އެ ޓްރައިބިއުނަލްގެ ރައީސް ކަމުގެ މަގާމަށް ގަނީ، އަދި ނާއިބު ރައީސްކަމުގެ މަގާމަށް، ހަސަން ޒުހައިރު މުހައްމަދު އައްޔަން ކުރިކަން ހާމަކޮށްފައެވެ.
ޣަނީ އަކީ މިސްރުގެ އަލްއަޒްހަރު ޔުނިވަސިޓީ އިން ޝަރީއަތާއި ގާނޫނުގެ ރޮނގުން މަތީ ތައުލީމު ހާސިލް ކުރައްވައިގެން ހުންނެވި ބޭފުޅެކެވެ. ޣަނީ ވަނީ ކުރިން ހައިކޯޓުގެ ފަނޑިޔާރުކަމާއި ހައިކޯޓުގެ އިސްފަނޑިޔާރު ކަމުގެ މަގާމުވެސް ފުރުއްވާފަ އެވެ. ސުޕްރީމް ކޯޓުގެ ފަނޑިޔާރު ކަމަށް ޣަނީ އައްޔަންކުރެއްވީ ޖޫން 28، 2018 ގައެވެ. ޣަނީ ސުޕްރީމް ކޯޓުގެ ފަނޑިޔާރުކަމުން ވަކިކުރީ ނިމިދިޔަ އެމްޑީޕީގެ ވެރިކަމުގަ އެވެ.
ޓެކްސް އެޕީލް ޓްރައިބިއުނަލްގެ ހަތަރު މެމްބަރަކު ވަކިކުރުމަށް ރައްޔިތުންގެ މަޖިލީހުން ފާސްކުރީ މިދިޔަ އޮގަސްޓް 19 ވަނަ ދުވަހު އެވެ. މަޖިލީހުގެ ލަފައާއި އެއްގޮތްވާ ގޮތުގެ މަތިން ރައީސުލްޖުމްހޫރިއްޔާ، ހަތަރު މެންބަރުން ވަކިކުރެއްވީ މިދިޔަ އޮގަސްޓް 26 ވަނަ ދުވަހު އެވެ.
