ހައްޔަރުކޮށްފައިވަނީ ކ. ކާށިދޫ، އަންދަލީބުގެ، މުހައްމަދު މައިހާން ފަޔާޒުއެވެ.
މީނާ ހައްޔަރުކޮށްފައިވަނީ މަސްތުވާތަކެތި ބޭނުންކޮށް، ގެންގުޅެ، އެކަމުގެ ވިޔަފާރި ކުރި ކަމުގެ ތުހުމަތުގައެވެ. މީނާ ހައްޔަރުކޮށް އޭނާ ދިރިއުޅޭ އެޕާޓުމަންޓުން ބަލާ ފާސްކުރުމުން އެތަނުން ކިލޯއެއްހާ ޑްރަގު ފެނިފައިވާކަމަށް ފުލުހުން ވަނީ ބުނެފައެވެ. އަދި 64،000 ރުފިޔާ އާއި ޑްރަގުގެ ވިޔަފާރިކުރުމަށް އެތަކެތި ބަންދުކުރުމަށް ބޭނުންކުރާ ސާމާނުވެސް އެތަނުން ފެނިފައިވާކަމަށް ފުލުހުން ބުނެއެވެ.
މި މައްސަލާގައި މީނާ ހައްޔަރުކޮށް ބަންދުގެ މުއްދަތު ވަނީ ޖަހާފައެވެ. ކޯޓުން މީނާގެ ބަންދަށް ޖަހާދިނީ 10 ދުވަހެވެ. ބަންދުގެ މުއްދަތު މަޖިލީހުގައި މި ޒުވާނާ ބުނީ އޭނާ އެގެއަށް ދިރިއުޅެން ބަދަލުކރިތާ އަދި ވީ އެންމެ ތިންވަރަކަށް ދުވަސްކަމަށެވެ. އަދި އެތަނުން ފެނުނު އެއްޗިއްސާ އޭނާއާ އެއްވެސް ގުޅުމެއް ނުވާކަމަށް މި ޒުވާނާ ވަނީ ކޯޓުގައި ބުނެފައެވެ.
މީނާގެ ބަންދުގެ އަމުރުގައި ވާގޮތުން ފުލުހުން ސީނަށް ދިޔުމުން މީނާ ވަީ ހެކި ނައްތާލަން މަސައްކަތްކޮށްފައެވެ. އަދި މީނާ ހުރީވެސް ޑްރަގު ބޭނުންކޮށްގެންކަން އޭނާގެ ކުޑަކަމުދާތަކެތި ޑްރަގަށް ޕޮޒިޓިވް ވެފައިވާ ކަމަށްވެސް އަމުރުގައިވެއެވެ.
