ފުލުހުން މި މައްސަލައިގައި ތަހުގީގު ފެށީ 25 އޮކްޓޯބަރު ރޭ 11:00 ހާއިރު ތިލަފުށީގައި ހުންނަ "ދަ ހޯކްސް: ގެ ބޯޓު ޔާޑަށް ގޮސްގެންނެވެ. ކުންފުނިން ބުނީ ފުލުހުންނަށް ފުރިހަމަ އެއްބާރުލުން ދީފައިވާ ކަމަށެވެ.
މި މައްސަލައިގައި ކުންފުނީގެ ރިސޯސްތައް ނަހަމަ ގޮތުގައި ބޭނުންކޮށްފައިވާކަން ކުންފުނީގެ އިންޓަރނަލް ތަހުގީގުން ވަނީ ހާމަވެފައިވާކަމަށް މިއަދު އެ ކުންފުނިން ނެރުނު ބަޔާނުގައި ބުނެފައިވެއެވެ.
"ދަ ހޯކްސް" އިން ބުނީ މި މައްސަލައިގައި ކުންފުނީގެ ކެމެރާ ފުޓޭޖްތައް ބެލިބެލުމުން، ބައެއް މުވައްޒަފުން ގަވައިދާ ހިލާފު ހަރަކާތްތަކެއް ހިންގައި، އަމިއްލަ މަންފާއަށް ކުންފުނީގެ ވަސީލަތްތައް ބޭނުންކޮށްފައިވާކަން ފާހަގަކުރެވުނު ކަމަށެވެ. އަދި މި މުވައްޒަފުން ވަގުތުން ވަޒީފާއިން އެކަހެރިކޮށް، މައްސަލަ ތަހުގީގީ އިދާރާތަކަށް ރިޕޯޓުކޮށްފައިވާ ކަމަށެވެ.
ދަ ހޯކްސްއިން ބުނީ މިފަދަ ގަވައިދާ ހިލާފު އަމަލުތަކުގައި އެ ކުންފުނިން ގެންގުޅެނީ "ޒީރޯ ޓޮލަރެންސް" ސިޔާސަތެއް ކަމަށާއި، ކުރިއަށް އޮތް ތަނުގައި މިފަދަ ކަންކަން ހުއްޓުވުމަށް އިތުރު ފިޔަވަޅުތަކެއް އަޅަމުންދާ ކަމަށެވެ.
ދަ ހޯކްސްއަކީ ތެލުގެ ވިޔަފާރިކުރާ ކުންފުންޏެއް ކަމަށާއި، ދުންފަތުގެ އެއްވެސް ބާވަތެއް އެތެރެކުރުމުގެ ވިޔަފާރިއެއް އެ ކުންފުނިން ނުކުރާ ކަމަށް ވަނީ ބުނެފައެވެ.
