އެންމެ މެމްބަރުން ގިނަ ޕާޓީއަށް ހެދުމަށް ވެރިކަން ކުރާ ޕީއެންސީއަށް މެމްބަރުން އިތުރުކުރުމުގެ މަސައްކަތް ފެށީ މިދިޔަ އޮގަސްޓްމަހުގެ ތެރޭގައިއެވެ. އޭރު އެޕާޓިން ބުނީ ރައީސް ޑރ މުއިއްޒުގެ އަމާޒަކީ ނޮވެމްބަރު އަންނަންވާއިރަށް ޕީއެންސީގެ މެމްބަރުގެ އަދަދު 75،000 އެރުވުންކަމަށެވެ.
މި ވެރިކަން ފެށުމުގެ ކުރިން ޕީއެންސީގެ މެމްބަރުންގެ އަދަދު އެހާ ގިނަ ނޫންނަމަވެސް ވެރިކަމަށް އައިތާ މާ ގިނަދުވަސްތަކެއް ނުވެ މެމްބަރުންގެ 28،704 އަރާ އެންމެ މެމްބަރުން ގިނަ ތިންވަނަ ޕާޓީއަށް ޕީއެންސީވިއެވެ.
ޕީއެންދީގެ ޕާލިމެންޓްރީ ގުރޫޕްގެ ލީޑަރު އިބްރާހިމް ފަލާހް ވިދާޅުވީ މިދިޔަ ދެ ދުވަހުގެ ތެރޭގައި ޕީއެންސީއަށް 10400 މީހުން ގުޅިފައިވާކަމަށެވެ. މިކަމުން ރަައީސް މުއިއްޒަށް އޮތް ތާއީދު ވަރަށް ސާފުކަމަށް ފަލާހް ވިދާޅުވިއެވެ.
އިލެކްޝަންސް ކޮމިޝަންގެ ދަފްތަރު ދައްކާ ގޮތުން އެންމެ މެމްބަރުން ގިނަ ޕާޓީއެއްގެ ގޮތުގައި އޮތީ އިދިކޮޅު އެމްޑީޕީއެވެ. އެޕާޓީގެ މެމްބަރުންގެ އަދަދަކީ 50،851 އެވެ. ދެވަނައަށް އެންމެ މެމްބަރުން ގިނަ ޕީޕީއެމްގައި ތިބީ 34،698 މެމްބަރުނެވެ.
ޕީއެންސީއަށް މެމްބަރުން އިތުރުކުރުމަށް ވަޒީފާގެ ބިރުގެ ދައްކާ ދައުލަތުގެ ވަސީލަތްތައް ބޭނުންކުރާކަމަށް އިދިކޮޅު އެމްޑީޕީއާ ޕީއެންއެފުން އަންނަނީ ބުނަމުންނެވެ. އަދި މިކަން ބަލާދިނުމަށް އިލެކްޝަންސް ކޮމިޝަނަށް ވަނީ އިދިކޮޅު ޕާޓީތަކުން ގޮވާލާފައެވެ.
އެހެންނަމަވެސް މި ތުހުމަތުތައް ޕީއެންސީން ދޮގުކުރެއެވެ.
