މިނިސްޓްރީން މި މަސައްކަތް ފެށީ މި އަހަރުގެ ފެބްރުއަރީ 12 ގައެވެ. އަދި މި މަހުގެ ނިޔަލަށް މި މަސައްކަތް ނިންމުމަށް ވަނީ އަމާޒު ހިފާފަ އެވެ.
މިނިސްޓްރީން ބުނީ މި ދަފުތަރު ފުރިހަމަ ކުރުމަށް ގިނަ މަސައްކަތްތަކެއް ކުރަމުންދާ ކަމަށެވެ. އެގޮތުން މަސްވެރި އުޅަނދުފަހަރުގެ ވެރިންނަށް ގުޅުމުގެ އިތުރުން މަސްވެރި ރަށްރަށާއި މަސްކިރާ ބަނދަރުތަކަށް މިނިސްޓްރީގެ މުވައްޒަފުން ދަތުރުކޮށް، ދަފުތަރުގައި ރަޖިސްޓަރީ ވުމުގެ މައުލޫމާތު އޮޑިވެރިންނާއި މަސްވެރިންނަށް ފޯރުކޮށްދެމުންދެ އެވެ.
މި ދަފުތަރު އެކުލަވާލުމުގެ މައިގަނޑު ބޭނުމަކީ އެހެން ދާއިރާތަކެކޭ އެއްފަދައިން މަސްވެރިކަމަކީ ވެސް ދައުލަތުން ބަލައިގަންނަ އާމްދަނީ ލިބޭ މަސައްކަތެއްގެ ގޮތުގައި ކަނޑައެޅުމެވެ. އަދި މި ދަފުތަރުން އެއްކުރެވޭ މައުލޫމާތުތަކަކީ މަސްވެރިކަމުގެ ދާއިރާ ތަރައްގީ ކުރުމަށް ހިންގާ މަޝްރޫއުތައް ރޭވުމަށާއި މަސްވެރިންނަށް ބޭނުންވާ ހިދުމަތްތައް ފޯރުކޮށްދިނުމަށް ސަރުކާރުން އެކުލަވާލާފައިވާ ސިޔާސަތުތައް ތަންފީޒު ކުރުމަށް މުހިންމު މައުލޫމާތުތަކެއް ކަމަށް މިނިސްޓްރީން ބުނެ އެވެ.
